Malegaon Sugar Factory News : मदननाना देवकातेंची नाराजी कायम; माळेगावच्या बॉयलर अग्निप्रदीपन कार्यक्रमात काय घडलं ?

Baramati News : बारामती तालुक्यातील माळेगाव कारखान्याच्या अध्यक्षपदाच्या निवडणुकीला महिना होत आला आहे. असे असले तरी यावरून झालेल्या नाराजीनाट्यावर अद्यापही पडदा पडलेला दिसत नाही.अध्यक्षपदी अॅड. केशवराव जगताप यांची निवड झाल्यानंतर ज्येष्ठ संचालक मदन देवकाते यांनी निरावागज येथे सभा घेत जाहीर नाराजी व्यक्त केली होती.

दरम्यान, रविवारी कारखान्याचा अग्निप्रदीपन कार्यक्रम पार पडला. या कार्यक्रमातही अध्यक्ष निवडीवरून सुरू झालेले नाराजीनाट्य कायम असल्याचे दिसून आले. राष्ट्रवादी काँग्रेस फुटीनंतर झालेल्या या पहिल्या निवडणुकीचा बारामती तालुक्याच्या राजकारणावर मोठा परिणाम होणार असल्याची चर्चा आहे.

कारखान्याच्या अध्यक्षपदी वर्णी लागावी म्हणून संचालक योगेश जगताप, ज्येष्ठ संचालक मदन देवकाते यांनी तगडी 'फिल्डिंग' लावली होती. अजितदादांनी मात्र ज्येष्ठ, अनुभवी म्हणून अॅड. जगताप यांच्या नावावर शिक्कामोर्तब केले. अॅड. जगतापांच्या नावाची घोषणा झाल्यानंतर योगेश जगतापांनी त्यांना आपला पाठिंबा जाहीर केला. मदननानांनी मात्र आपल्या निरावागज गावातील चिंतन सभेत दुजाभाव केल्याचा आरोप करत नाराजी जाहीर केली. (Madan Devkate)

मदन देवकाते म्हणाले होते, गेल्या ४० वर्षांच्या राजकारणातील ३१ वर्षे कारखान्यासाठी काम केले. पक्षाने सांगितली ती भूमिका मन लावून पार पाडली. विरोधातील पॅनेल सत्तेत बसविण्यासाठी जिवाचे रान केले. विजयासाठी केलेल्या प्रयत्नांतून कुणालाही पदाची अपेक्षा असतेच. पक्षाशी कायम एकनिष्ठ राहूनही पद दिले जात नाही, यातूनच मनात प्रश्न निर्माण झाला, एका विशिष्ट समाजात जन्माला आलो म्हणून मला डावलले का? असा सवालही त्यांनी उपस्थित केला.

मदन देवकातेंनी अजित पवारांना(Ajit Pawar) उद्देशून अनेक प्रश्न उपस्थित केले होते. आता माळेगावच्या बॉयलर अग्निप्रदीपन कार्यक्रम अध्यक्ष केशव जगताप आणि त्यांच्या पत्नी शांताबाई जगताप यांच्या हस्ते पार पडला. या वेळी मदननाना मागील रांगेत बसले होते. बॉयलर प्रज्वलित करताना सर्व संचालक जवळ होते. यानंतर फोटोसेशनही झाले.

मात्र, मदन देवकाते यांनी चार हात लांब राहणेच पसंत केले. त्यांना इतर ज्येष्ठ संचालकांनी आग्रह केला तरी ते दूरच राहिले. या भूमिकेमुळे मदन देवकातेंच्या मनातील खदखद कायम असल्याचे बोलले जात आहे. देवकातेंची ही खदखद तालुक्यातील राजकारणावर परिणाम करणार असल्याची चर्चा राजकीय वर्तुळात आहे.

याबाबत मदन देवकाते 'सरकारनामा'शी बोलताना म्हणाले, कारखान्याचा बॉयलर प्रज्वलन हा शुभ कार्यक्रम असतो. कार्यक्रमाला मी येण्यापूर्वीच काही मंडळी पुढच्या रांगेत बसली होती. मी कार्यक्रमाच्या ठिकाणी नारळ फोडला. नाराजी वगैरे असे काही नाही. कार्यकर्त्यांमध्ये तशी चर्चा होत असते. (Malegaon Sugar Factory News)

राजकारणात थोडे मागेपुढे होतच राहते. ही लोकशाही आहे, त्यामुळे प्रत्येकाचा आदर करणे आपले कर्तव्य आहे. दरम्यान, सर्व कार्यक्रमात नानांचा ओसंडून वाहणारा उत्साह या वेळी दिसला नसल्याची चर्चा मात्र उपस्थितांमध्ये होती.

(Edited By Deepak Kulkarni)