Yugendra Pawar : 'दुसऱ्यांना अनेक संधी दिल्या पण मला फक्त एक...', युगेंद्र पवारांचे सांगता सभेत बारामतीकरांना आवाहन

Yugendra Pawar News : प्रचाराच्या शेवटच्या दिवशी बारामतीमध्ये लेंडीपट्टा मैदानात युगेंद्र पवार यांची सांगता सभा झाली. या सभेत अजित पवार यांचे नाव न घेता युगेंद्र पवार म्हणाले 'तुम्ही दुसऱ्यांना अनेकदा संधी दिली. पण मला एक संधी देऊन बघा आत्तापेक्षा जास्त चांगल काम करून दाखवतो.शाश्वत विकास करून दाखवतो.'

'दुसऱ्यांना अनेकदा संधी दिल्या तरी आपली अनेक काम अडकली आहेत. तिच तिच कामं अडखली आहेत.मला संधी द्या सर्वसामान्य लोकांची कामं करून दाखवतो. तुम्हाला माहिती आहे आत्ता कुणाची कामं होतात ती', असे टोलाही युगेंद्र पवार यांनी लगावला.

पवारसाहेबांनी लोकांची कामं केली त्यामुळे लोक त्यांच्या मागे उभे आहेत.महाराष्ट्रात नाही तर बारामतीतही तुतारी वाजणार, असा विश्वास युगेंद्र पवार यांनी व्यक्त केला.

...तर तुमचं मत भाजपला

बारामतीमध्ये आपण कधीच महायुतीला येऊन दिलं नाही. भाजपला आपण स्वीकारलं नाही. जे आपल्याला सोडून गेले त्यांच्या पेक्षा जास्त आमदार भाजपचे आहेत. हा तालुका पुरोगामी विचार जपणार आहे. आपण कधीच भाजपला मत दिलं नाही. जर तुम्ही त्यांना मत देताय म्हणजे तुम्ही भाजपला मत देताय हे आपण लक्ष्यात ठेवलंय पाहिजे, असे देखील युगेंद्र पवार यांनी सांगितले.

पाणीप्रश्न सोडवणार

बारामतीचा शाश्वात विकास करत असताना आपण पाण्यावर काम करणार आहोत. जनाई-शिरसाई योजना पवारसाहेबांनी आणली. तिचे 20 टक्के काम शिल्लक आहे. पाणी आणल्याशिवाय मी शांत राहणार नाही. इंदापूर दौंड यांचं पाणी नकोय. पण हक्काचे पाणी आणल्याशिवाय राहणार नाही, असा शब्द युगेंद्र पवारांनी दिला. तसेच पवारसाहेबांनी जसं पुण्यातील हिंजवडीमध्ये आयटी पार्क काढले. तसे बारामतीमध्ये पहिलं आयटी पार्क आपण बांधून दाखवणार आहे, असे देखील युगेंद्र पवार म्हणाले.