खेड तालुक्यात भर चौकात तरुणाचा गोळ्या घालुन खून..

खेड : खेड तालुक्यात चाकण परिसरातील शेलपिंपळगाव येथे भर चौकात गुरुवारी (ता.23 डिसेंबर) एका युवकाची गोळ्या घालून निर्घृण हत्या करण्यात आली आहे. जुन्या वादातुन हा खुन झाल्याचा अंदाज चाकण पोलीसांनी (Pimpri Police) व्यक्त केला आहे. याप्रकरणी योगेश दौंडकर याच्यासह चार जणांवर खुनाचा गुन्हा दाखल करण्यात आला आहे. नागेश सुभाष कराळे ( वय 38, रा. शेलपिंपळगाव, ता. खेड, जि. पुणे ) असे खून झालेल्या युवकाचे नाव आहे.

चाकण आणि परिसरात गेल्या महिन्यांपासुन निघृण खुनांच्या घटनांमध्ये सातत्याने वाढ होत आहे. यामुळे कायदा व सुव्यवस्थेचा प्रश्न चव्हाट्यावर आला आहे. शेलपिंपळगाव येथील मिलिंद बिअर शॉपी जवळ नागेश कराळे हे आपल्या चारचाकी वाहनात बसत असताना लगतच्या फोर्ड फिगो वाहनात दबा धरून बसलेल्या हल्लेखोरांनी नागेशवर चार गोळ्या झाडल्या. यामध्ये नागेश गंभीर जखमी झाले होते. त्यानंतर तत्काळ त्यांना चाकण येथील खाजगी रुग्णालयात उपचारासाठी दाखल करण्यात आले. मात्र, डॉक्टरांनी उपचारापूर्वीच त्यांना मयत झाल्याचे घोषित केले.

दरम्यान, पिंपरी चिंचवड पोलीस आयुक्तालयाच्या वरिष्ठ पोलीस अधिकाऱ्यांनी घटनास्थळाची पहाणी केली असुन गिरीष बाळासाहेब कराळे यांच्या फिर्यादीवरुन योगेश दौंडकर याच्यासह चार जणांवर खुनाचा गुन्हा दाखल करण्यात आला आहे. या घटनेतील आरोपींच्या शोधासाठी पोलिसांकडून पथके रवाना करण्यात आली आहे. आरोपी योगेश दौंडकर आणि नागेश कराळे यांच्यात जुने वाद होते. या वादाला राजकिय पाठबळही असल्याची चर्चा शेलपिंपळगाव परिसरात आहे. या जुन्या वादाची फास अखेर खुनापर्यत पोहचली आणि गोळीबार करत नागेश कराळेचा खुन करण्यात आला आहे. खुनासाठी वापरण्यात आलेली पिस्तुल कशी आली यामध्ये दोघांच्या जुन्या वादात राजकिय पाठबळ आहे का? याबाबींकडे चाकण पोलीस कसे पहाणार हे पहावे लागणार आहे.