NCP News : राष्ट्रवादीच्या युतीचा 'कोल्हापूर' पॅटर्न 'पुण्यातही' लागू होणार?... आरक्षण जाहीर होताच बैठकीत झाला मोठा निर्णय

Pune News : महापालिका निवडणुकांची आरक्षण सोडत जाहीर होतात आता निवडणूक लढवण्यास इच्छुक असलेल्या नेत्यांमध्ये उत्साह संचारला आहे. पक्षाकडून आता बैठकांचे सत्र सुरू झाले असून कोणासोबत जाऊन युती किंवा आघाडी करायचे याबाबतचा अंतिम निर्णय होऊ लागला आहे. आरक्षण सोडतीनंतर मंगळवारी पुण्यामध्ये राष्ट्रवादी काँग्रेस शरदचंद्र पवार पक्षाची महत्त्वाची बैठक झाली. या बैठकीनंतर शहराध्यक्ष प्रशांत जगताप यांनी आघाडी बाबतची भूमिका स्पष्ट केली.

प्रशांत जगताप म्हणाले, 'आजच्या बैठकीमध्ये आघाडीबाबत स्पष्ट भूमिका घेण्यात आली आहे. गेल्या काही दिवसांपासून राज्यातील विविध भागातून वेगवेगळ्या आघाड्यांबाबतच्या बातम्या समोर येत आहेत. महायुतीमधील पक्ष आणि महाविकास आघाडीतील पक्ष स्थानिक स्वराज्य संस्थांच्या निवडणुकीच्या निमित्ताने काही ठिकाणी एकत्र येताना पाहायला मिळत आहेत.

मात्र, पुणे शहरामध्ये राष्ट्रवादी काँग्रेस शरदचंद्र पवार (Sharad Pawar) पक्ष हा महायुतीतील कोणताही मित्रपक्षासोबत उघड किंवा छुपी युती करणार नाही. ही महापालिका निवडणूक ही आम्ही महाविकास आघाडी म्हणूनच लढणार आहे. कोल्हापूरमध्ये दोन्ही राष्ट्रवादी एकत्रित येऊन निवडणूक लढवणार चर्चा सुरू आहेत. मात्र, तशा गोष्टी पुण्यामध्ये घडणार नाहीत. पुणे शहराचा महायुतीने वाटोळे केला असून त्या विरोधात आमची लढाई असणार आहे. त्यामुळे महायुतीतील कुठलाही पक्षासोबत आम्ही या निवडणुकीत जाणार नाही.

पुण्यामध्ये महाविकास आघाडी म्हणून आम्ही निवडणुकीला सामोरे जाणार आहे. त्याबाबत वरिष्ठ नेत्यांची देखील चर्चा झाली आहे. मात्र, अंतिम निर्णय हा वरिष्ठ पातळीवर घेण्यात येईल. पक्षाचे अध्यक्ष शरद पवार यांनी याबाबतचा निर्णय घेण्याचा अधिकार आम्हा वरिष्ठ नेते मंडळींना दिला आहे. त्यामुळे महाविकास आघाडीबाबतचा निर्णय आम्ही घेतला असल्याचे प्रशांत जगताप म्हणाले.

उपमुख्यमंत्री अजित पवार यांचा राष्ट्रवादी पक्ष (NCP) हा महायुतीचा घटक आहे. त्यामुळे त्या पक्षासोबत जाण्याचा आमचा कोणताही मानस नाही. मात्र अंतिम निर्णय हा शरद पवारांचा असेल, असे प्रशांत जगताप म्हणाले. तसेच राज ठाकरे यांच्या मनसेसोबत आघाडी करायची की नाही याबाबत देखील सर्वस्वी निर्णय हे वरिष्ठ पातळीवर होईल, त्याबाबतचा निर्णय हे शरद पवार, हे घेतील असे जगताप यांनी स्पष्ट केले.

महायुतीच्या मित्र पक्षांमध्ये मोठ्या प्रमाणात इनकमिंग होत आहे. त्याच पद्धतीचा इन्कमिंग पुढील चार ते पाच दिवसात राष्ट्रवादी काँग्रेस शरदचंद्र पवार पक्षामध्ये सुरू होणारा असून वीस ते पंचवीस प्रवेश येत्या काळामध्ये होणार असल्याचे राष्ट्रवादीकडून सांगण्यात आले आहे. मात्र हे इनकमिंग होत असताना कार्यकर्त्यांवर अन्याय होऊ दिला जाणार नाही. सक्षम उमेदवार आहेत. त्या ठिकाणी आम्हाला बाहेरून नवरे आणायची गरज नाही, असे देखील यावेळी स्पष्ट करण्यात आले.