Gun Case : पुणे विमानतळावर मोठा राडा! राष्ट्रवादीचा नेता रिव्हॉल्वर घेऊन वाराणसीला निघाला, नेमकं काय घडलं?

Pune News: पुणे विमानतळावरून वाराणसीला निघालेल्या राष्ट्रवादी काँग्रेसच्या नेत्याच्या बॅगेमध्ये रिव्हॉल्वर आणि काडतुसे आढळल्याने एकच खळबळ उडाली. या नेत्याचे नाव चंद्रकांत प्रभाकर बागल (वय 63, गादेगाव) असे आहे. ते सोलापूर जिल्ह्यातील पंढरपूर तालुक्यातील राष्ट्रवादी काँग्रेसचे ज्येष्ठ नेते आहेत. ते जिल्हा परिषद सदस्य देखील राहिले आहेत. तसेच 2014 ची विधानसभा निवडणूक देखील त्यांनी लढली होती. पोलिसांनी रिव्हॉल्वर आणि काडतुसे आढळल्या प्रकरणी त्यांच्यावर गुन्हा दाखल केला आहे.

मिळालेल्या माहितीनुसार, शुक्रवारी रात्री साडेदहाच्या सुमारास विमानतळावर सुरक्षा तपासणीवेळी बागल यांच्या सामानातून भारतीय बनावटीचे रिव्हॉल्वर, पाच जिवंत काडतुसे आणि एक रिकामे काडतूस सापडले. सीआयएसएफ आणि विमानतळ अधिकाऱ्यांनी त्यांना ताब्यात घेऊन विमाननगर पोलिसांच्या स्वाधीन केले. पोलिसांनी भारतीय शस्त्र अधिनियम 1959 अंतर्गत गुन्हा नोंदवला आहे.

चौकशीत समोर आले की, बागल यांच्याकडे शस्त्राचा परवाना आहे परंतु तो फक्त महाराष्ट्रात वैध आहे. वाराणसीला प्रवास करताना त्यांनी आवश्यक परवानगी न घेतल्याने नियमांचा भंग झाला. याप्रकरणी त्यांचे शस्त्र जप्त करण्यात आले असून चौकशीसाठी नोटीस देऊन त्यांना पुढील प्रवासाची परवानगी देण्यात आली.

वरिष्ठ निरीक्षक गोविंद जाधव यांनी सांगितले, की संबंधित व्यक्तीला सीआयएसएफ व विमानतळ प्राधिकरणाच्या अधिकाऱ्यांनी ताब्यात घेतलेले होते. त्यांनी पोलिसांना या प्रकरणाची माहिती दिले. त्यांनी सरकारने आखून दिलेल्या शस्त्र परवाना नियमावलीचे व अटी-शर्तीचे उल्लन्घन केल्याचे समोर आले आहे. त्यांच्यावर गुन्हा दाखल करण्यात आला आहे. ते कुटुंबीय व अन्य लोकांसोबत वाराणसी येथे निघालेले होते. त्यांना चौकशीसंबंधी नोटीस दिली असून पुढील प्रवासासाठी परवानगी देण्यात आली. ते वाराणसी येथे गेले आहेत.