Sharad Pawar Vs Ajit Pawar : पिंपरीत अजित पवारांना मोठा धक्का! शरद पवार गटात इन्कमिंग

Sharad Pawar News : कधीकाळी राष्ट्रवादीचा बालेकिल्ला समजल्या जाणाऱ्या पिंपरी-चिंचवडमध्ये अजित पवार गटाला शरद पवार गटाने धक्का दिला आहे. पिंपरी-चिंचवडच्या राष्ट्रवादीच्या शहराध्यक्ष अजित गव्हाणेसह 16 माजी नगरसेवकांनी पुण्यातील मोदीबागेत शरद पवारांची भेट घेतली. पाच जुलैला शरद पवार गटात या माजी नगरसेवकांची प्रवेश होण्याची शक्यता आहे. आज (रविवारी) पुन्हा विलास लांडेंच्या उपस्थितीत होणार भेट होणार, असे वृत्त 'साम' टिव्हीने सुत्रांच्या हवाल्याने दिले आहे.

लोकसभेच्या निकालानंतर अनेक पदाधिकारी, नेत्यांचा ओढा हा महाविकास आघाडीकडे वळला आहे. ठाकरे गटाने गद्दारांना पक्षात प्रवेश देणार नाही, असे जाहीर केले आहे. तर, शरद पवार गटाकडून काही जणांना प्रवेश दिला जाईल असे स्पष्ट केले होते.

माजी नगरसेवकांनी घेतलेल्या भेटीवर शरद पवार Sharad Pawar म्हणाले, पिंपरी चिंचवड मधील काही माजी नगरसेवकांनी माझी भेट घेतली आहे. आजही काही लोक भेट घेणार आहेत. याचा मला आनंद आहे की महाराष्ट्राच्या हितासाठी आपण एकत्र राहून असं त्यांना वाटत आहे. जे काही पूर्वी निर्णय घेतले ते हिताचे नव्हते या निष्कर्षापर्यंत आता ते लोक पोचू लागले आहेत. पक्षांमध्ये येणाऱ्यांचा आम्ही स्वागत करू, असे पवार म्हणाले.

शरद पवार गटात इन्कमिंग वाढत आहे. पक्षांमध्ये येण्यासाठी शरद पवार यांच्यात रोज नवनवीन नेते भेटी घेत आहेत. याबाबत बोलताना शरद पवार म्हणाले,'सध्या मला रोज दोन ते तीन तास पक्षांमध्ये येऊ इच्छिणाऱ्या लोकांना भेटण्यासाठी काढावे लागतात.

विधानसभेची तयारी

शरद पवार विधानसभेच्या Assembly Elections तयारीला लागले आहेत. त्यादृष्टीने त्यांनी मित्रपक्षांना जागा देणे ही आमची जबाबदारी असल्याचे म्हटले आहे. विधानसभा निवडणुकीमध्ये आमच्याकडे कोणत्या जागा येणार आहेत, याबाबत सुरुवातीला चाचपणी करू आणि नंतर तरुण पिढीला जास्तीत जास्त प्रोत्साहित करण्याच्या दृष्टिकोनातून निर्णय घेऊ, असे म्हणत तरुणांना तिकीट देण्याचे संकेत दिले आहेत.