Pimpri Chinchwad News : पिंपरीचं राजकारण तापलं : 'आमदार लांडगे दुटप्पी' ; राष्ट्रवादीच्या गव्हाणेंचा हल्लाबोल

पिंपरीः कचरा संकलन सेवा शुल्काच्या (उपयोगकर्ता शुल्क) नावे घरटी दरमहा 60 रुपये शुल्क या महिन्यापासून आकारण्याचा निर्णय पिंपरी चिंचवड महापालिकेने घेतला आहे. त्याला कडाडून विरोध सत्ताधारी भाजपच नाही, तर विरोधी बाकावरील राष्ट्रवादी कॉंग्रेसनेही आता विरोध केला आहे. (Pimpri Chinchwad News)

भाजपचे शहर अध्यक्ष आणि कारभारी आमदार भोसरीचे महेश लांडगे (Mahesh Landge) यांनी या कराला विरोध करीत तो रद्द करण्याची मागणी पालिका आय़ुक्त तथा प्रशासक शेखरसिंह यांच्याकडे काल केली. त्यानंतर राष्ट्रवादीनेही त्याला कडाडून विरोध आज केला. मात्र, तो करताना त्यांनी भाजपलाच लक्ष्य केलं. उपयोगकर्ता शुल्कावरून भाजपाने जनतेला वेड्यात काढण्याचे धंद्दे बंद करावे, असा हल्लाबोल राष्ट्रवादीचे शहराध्यक्ष अजित गव्हाणे (Ajit Gavhane) यांनी केला.

हे नवे कचरा शुल्क तथा कर लागू करण्याचा निर्णय अन्यायकारक असून तो रद्द करावा, अशी सूचना भाजप शहराध्यक्षांनी केली. मात्र, राज्यात भाजपची सत्ता असून पालिकेत त्यांच्या मर्जीतीलच आयुक्त आहेत. असे असताना हा कर लागू करायचा आणि नंतर तो रद्द करण्याची मागणी करायची, यातून भाजप शहराध्यक्षांची दुटप्पी भूमिका समोर येते, असा टोला गव्हाणेंनी आमदार लांडगेंचे नाव न घेता लगावला.

यातून भाजपवाल्यांनी जनतेला वेड्यात काढण्याचे धंदे बंद करावेत. जनता महागाईने होरपळत असताना सेवा शुल्क लागू करून त्यांच्या जखमेवर मोठी चोळण्याचे काम भाजपवाले करत आहेत. त्यांना सातत्याने जनतेची दिशाभूल करण्याची सवयच जडली असल्याची, कोपरखळी त्यांनी मारली. शेखर सिंह आयुक्त म्हणून आल्यापासून अनेक उलटसुलट निर्णय घेत आहे. कोट्यावधी रूपयांच्या निविदांना मंजुरी देण्याचा त्यांनी सपाटा लावला आहे. भाजप नेत्यांच्या दबावाखाली विविध कामांना खैरात वाटल्यासारखे कोट्यावधी रूपये वाढीव देत असल्याचा आरोपही गव्हाणेंनी केला.