PMC Election 2025: "महापालिका निवडणुकांमध्ये व्हीव्हीपॅट हटवून घोटाळ्याचा डाव"; मविआ घेणार सुप्रीम कोर्टात धाव

Pune News : राज्यातील स्थानिक स्वराज्य संस्थांच्या निवडणुकीची प्रक्रिया सुरू झाली असून प्रभाग रचनेचा काम करण्यात येत आहे, अशातच या निवडणुकीसाठी व्हीव्हीपॅट मशीन वापरली जाणार नाहीत, अशी माहिती राज्य निवडणूक आयुक्तांनी दिली आहे. यावरून आता महाविकास आघाडीतील नेते आक्रमक झाल्याचं पाहायला मिळत आहेत. तसंच यासाठी ते सुप्रीम कोर्टात धाव घेणार असल्याची महिती, शरद पवारांच्या राष्ट्रवादीचे शहराध्यक्ष प्रशांत जगताप यांनी दिली.

जगताप म्हणाले, राज्य निवडणूक आयोगाने आज एक आत्मघातकी निर्णय घेतला आहे. या निर्णयामुळं ज्या ईव्हीएम घोटाळ्याबाबतचा आरोप आम्ही करत आहोत तो खरा होता यावर शिक्कामोर्तब होत आहे.

विधानसभा निवडणुकीमध्ये ईव्हीएम आणि व्हीव्हीपॅट संदर्भात जे घोळ झाले ते आम्ही कोर्टासमोर मांडले आहेत. त्याबाबतचा अध्याप निकाल येणे बाकी असताना, आगामी स्थानिक स्वराज्य संस्थांच्या निवडणुकांमध्ये व्हीव्हीपॅटचा वापर न करण्याचा निर्णय राज्य निवडणूक आयोगाने घेतला आहे.

हा राज्य निवडणूक आयोगाचा निर्णय धक्कादायक असून आता राज्यातील येणाऱ्या आगामी स्थानिक स्वराज्य संस्थांच्या निवडणुकांमध्ये महायुती सरकार काहीतरी घोळ करणार यावर शिक्कामोर्तब करणारा आहे. राज्य निवडणूक आयोगाच्या या निर्णयाविरोधात आम्ही सुप्रीम कोर्टात जाणार असल्याचं जगताप यांनी सांगितलं आहे.

पारदर्शक निवडणूक प्रक्रियेसाठी व्हीव्हीपॅटची आवश्यकता आहे, हे आम्ही सुप्रीम कोर्टाच्या निदर्शनास आणून देणार आहोत. ईव्हीएमवर निवडणुका घ्याव्यात असा कोणताही कायदा अद्याप पास झालेला नाही. त्यामुळं राज्य निवडणूक आयोगाकडे व्हीव्हीपॅटची कमतरता असेल तर त्यांनी बॅलेट पेपरवर मतदान घ्यावं, अशी आमची मागणी असणार आहे. मात्र, व्हीव्हीपॅटचा वापर न करता मतदान घेणे म्हणजे एक प्रकारे या मतदान प्रक्रियेमध्ये घोटाळा करण्यासारखंच आहे.