PMC Recruitment: अधिक्षक अभियंतापदाची पदोन्नती रद्द करा! पुणे महापालिकेला हायकोर्टाचे आदेश

PMC Recruitment: पुणे महापालिकेत कार्यकारी अभियंता हुद्द्यावरील अधिकाऱ्यांना अधिक्षक अभियंता पदावर पदोन्नती देताना चुकीच्या कार्यपद्धतीचा अवलंब केला. त्यामुळे अन्य अभियंते पदोन्नतीपासून वंचित राहिल्याने उच्च न्यायालयाने महापालिकेला दणका दिला आहे. महापालिका प्रशासनाने केलेल्या सर्व पदोन्नती रद्द करण्याचे आदेश दिले आहेत. महापालिकेत व्यवस्थित निर्णय न घेतल्याने हा वाद न्यायालयात गेल्याने महापालिकेवर मोठी नामुष्की ओढवली आहे.

पुणे महापालिकेतील १५ कार्यकारी अभियंत्यांना अधिक्षक अभियंता पदोन्नती देण्याचा प्रस्ताव सामान्य प्रशासन विभागापुढे होता. पण यामध्ये चुकीच्या पद्धतीने प्रक्रिया राबविली जात असल्याने सेवाज्येष्ठता असूनही अन्याय होत असल्याची तक्रार काही अभियंत्यांनी प्रशासनाकडे केली होती. त्यानंतर त्यांचे म्हणणे महापालिका प्रशासनाने ऐकून घेतले पण त्यानुसार सेवा ज्येष्ठता यादीत बदल केला नाही. चार कार्यकारी अभियंत्यांना अधिक्षक अभियंतापदी पदोन्नती देण्याचा निर्णय विभागीय पदोन्नती समितीने घेतला. त्यानंतर मुख्यसभेतही त्याचा ठराव करण्यात आला. त्यामुळे ज्यांच्यावर अन्याय झाला अशा पाच अभियंत्यांनी उच्च न्यायालयात महापालिकेच्या विरोधात याचिका दाखल केली. त्यामध्ये चार अभियंत्यांना दिलेली पदोन्नती रद्द करण्याचा निर्णय घेतला आहे.

पुणे महापालिका प्रशासनाने २०१९ पासून पदोन्नती प्रक्रियेत अनेक चुका केल्या आहेत. त्याबाबत अनेक तक्रारी असल्या तरी सामान्य प्रशासन विभागाकडून बदल केला जात नाही. अभियंता पदोन्नतीचा वाद २०२४ पासून सुरु असताना त्यामध्ये चुकीच्या पद्धतीने नियम लावल्याने उच्च न्यायालयात महापालिकेच्या विरोधात निर्णय जाऊन पदोन्नती रद्द करावी लागली आहे. त्यामुळे आता यातील पात्र असलेल्या अभियंत्यांना पदोन्नती द्यावी लागणार आहे.

सगळेच अधिकारी सावध

पुणे महापालिकेतील अभियंत्यांमधील पदोन्नतीचे भांडणे थेट न्यायालयात गेली आहेत. गेल्या सहा महिन्यापासून याचे पडसाद महापालिकेत उमटत होते. पण आता महापालिकेच्या विरोधात न्यायालयाने निर्णय दिल्याने सर्वच अधिकाऱ्यांनी या वादात पडायला नको म्हणत न बोलणे पसंत केले आहे.