Pimpri : आगामी लोकसभा निवडणुकीसाठी `इंडिया ` या आघाडीखाली विरोधी पक्ष एकटवटल्याने भाजपने ही निवडणूक गांभीर्याने घेतली असून आता ती प्रतिष्ठेचीही केली आहे.म्हणून ती जिंकण्यासाठी जोरदार तयारी सुरु केली असून त्याकरिता `महाविजय २०२४` ही मोहीम त्यांनी हाती घेतली आहे. त्याअंतर्गत राज्यातील ४८ लोकसभा लोकसभा मतदारसंघासाठी समन्वयक काल (ता.३) प्रदेशाध्यक्ष चंद्रशेखर बावनकुळे यांनी नेमले.
दरम्यान,यापूर्वी आठ जुनला बावनकुळेंनीच राज्यातील सर्व लोकसभा मतदारसंघांसाठी निवडणूकप्रमुख नेमले होते.त्यानंतर आज तेथे समन्वयकांचीही नियुक्ती करण्यात आल्याने पक्षाच्या कार्यकर्त्यांत काहीसा गोंधळ उडाला. पूर्वीचे निवडणूकप्रमुख रद्द करून तेथे हे समन्वयक नेमण्यात आल्याची चर्चा त्यांच्यात रंगली. त्यामुळे याबाबत सरकारनामाने थेट बावनकुळेंशीच संपर्क साधला. तेव्हा या गोंधळाचे निरसन झाले. त्यांनी ही चर्चा बरोबर नसल्याचे सांगितले. लोकसभा मतदारसंघनिहाय निवडणूकप्रमुख आणि आता काल तेथे नेमलेले समन्वयक या दोन्ही जबाबदाऱ्या आणि पदे वेगवगेळी असल्याचे त्यांनी स्पष्ट केले.
२०२४ ची लोकसभा निवडणूक ही `करो या मरो` ची लढाई असल्याचे भाजपच्या प्रदेश पातळीवरील एका पदाधिकाऱ्याने आज `सरकारनामा`ला सांगितले. त्यातून ही निवडणूक पक्षाने किती गांभिर्याने घेतली आहे, याची कल्पना येते. म्हणून महाराष्ट्र भाजपला ४५ जागांचे लक्ष्य मोदी-शहा-नड्डांनी दिले आहे. तर, देशपातळीवर सव्वातीनशे जागा जिंकून स्वबळावर बहूमताने केंद्रात सत्तेची हॅटट्रिक नोंदविण्याचे त्यांचे लक्ष्य आहे. त्यात त्यांनी आपले खासदार नसलेल्या जागा रडारवर घेतल्या आहेत. त्याच्या तयारीसाठी यापूर्वी ८ जूनला त्यांनी प्रत्येक मतदारसंघनिहाय प्रचारप्रमुख नेमले होते. त्यानंतर आता तेथे काल समन्वयकांचीही नेमणूक केली. ते लोकसभा निवडणुकीत महायुतीतील तिन्ही पक्षांत समन्वय ठेवण्याचे काम करणार आहेत.
पुणे जिल्ह्यातील मावळ,शिरूर आणि बारामती लोकसभा मतदारसंघाचे समन्वयक म्हणून अनुक्रमे विक्रांत पाटील, राजेश पांडे आणि जालिंदर कामठे,तर पुण्यासाठी मुरलीधर मोहोळ यांची नेमणूक भाजपने केली आहे. जेथे आमचा उमेदवार असेल तेथे या निुयुक्तीचा फायदाच आहे. पण, त्याचा तसेच आमच्या संघटनबांधणीचा मित्रपक्षाच्या उमेदवारालाही फायदाच होईल, अशी प्रतिक्रिया मावळचे समन्वयक पाटील यांनी या नेमणुकीनंतर आज `सरकारनामा`ला दिली.बारामतीत पूर्वाश्रमीचे राष्ट्रवादीचे कामठे यांची नियुक्ती करीत भाजपने खेळी केली आहे.तर, प्रदेश उपाध्यक्ष पांडेवर शिरूरची जबाबदारी टाकत त्यांना पुणे शहरातून जिल्ह्याच्या ग्रामीण राजकारणात उतरवले आहे.
Edited By : Mangesh Mahale
Read Latest Marathi Political News, Breaking Political News from Maharashtra, India, Pune & Mumbai at Sarkarnama. To Get Live Political Marathi News on Mobile, Download the Sarkarnama Mobile App for Android and IOS. सरकारनामा आता सर्व सोशल मीडिया प्लॅटफॉर्मवर. ताज्या राजकीय घडामोडींसाठी फेसबुक, ट्विटर, इन्स्टाग्राम, शेअर चॅट, टेलिग्रामवर आणि व्हॉट्सॲप आम्हाला फॉलो करा. तसेच, सरकारनामा यूट्यूब चॅनेलला आजच सबस्क्राइब करा.