Andekar Gang : नेकी का काम, आंदेकर का नाम! पुण्यात गँगस्टर बंडू आंदेकरच्या घोषणांच्या आवाजानं घुमलं स्टेडियम; राष्ट्रवादीचा AB फॉर्म नसल्याने अपक्ष अर्ज

Andekar Gang : कुख्यात गुंड बंडू आंदेकर आणि त्याच्या कुटुंबातील सदस्यांनी शनिवारी पुणे महापालिका निवडणुकीसाठी अर्ज दाखल दाखल केला. पोलीस संरक्षणात, तोंडावर बुरखा घालून आंदेकरला भवानी पेठेतील निवडणूक कार्यालयात आणण्यात आले होते. यावेळी प्रसार माध्यमांच्या कॅमेरांसमोर घोषणाबाजी करत त्याने चमकोरिगी करण्याचा प्रयत्न केला. बंडू आंदेकरशिवाय सोनाली वनराज आंदेकर आणि लक्ष्मी उदयकांत आंदेकर यांनीही पोलीस संरक्षणात उमेदवारी अर्ज भरला.

आयुष कोमकर हत्या प्रकरणात बंडू आंदेकर सध्या न्यायालयीन कोठडीत आहे. न्यायालयाने त्याच्यासह माजी नगरसेविका लक्ष्मी आंदेकर आणि माजी नगरसेवक वनराज आंदेकर यांची पत्नी सोनाली आंदेकर यांना आगामी महापालिका निवडणूक लढण्यासाठी सशर्त परवानगी दिली आहे. मात्र, मिरवणूक, भाषण किंवा घोषणाबाजी करण्यास न्यायालयाने स्पष्ट मनाई केली आहे. पोलीस बंदोबस्तातच उमेदवारी अर्ज दाखल करण्यास परवानगी देण्यात आली होती. त्या पार्श्वभूमीवर निवडणूक कार्यालय परिसरात कडेकोट पोलीस बंदोबस्त तैनात केला होता.

राष्ट्रवादीचा एबी फॉर्म की अपक्ष?

पुणे महानगरपालिकेच्या यापूर्वीच्या निवडणुकीत आंदेकर कुटुंब राष्ट्रवादी काँग्रेस आणि काँग्रेस पक्षाशी संबंधित राहिलं आहे. आगामी महापालिका निवडणुकीत आंदेकर राष्ट्रवादी काँग्रेसकडून लढणार की ते अपक्ष लढणार याकडं सर्वांचंच लक्ष लागलं होतं. आंदेकर कुटुंबातील व्यक्तींना उमेदवारी देण्यास राष्ट्रवादी काँग्रेसही सकारात्मक असल्याची चर्चा होती. पण शनिवारी अर्ज भरताना तिघांनाही राष्ट्रवादीने एबी फॉर्म दिला नव्हता. त्यामुळे अपक्ष अर्ज दाखल केले आहेत.

अर्ज दाखल करताना घोषणाबाजी :

प्रसार माध्यमांच्या कॅमेरांसमोर घोषणाबाजी करत बंडू आंदेकरने चमकोरिगी करण्याचा प्रयत्न केला. भवानी पेठेतील अरुण कुमार वैद्य स्टेडियममध्ये तो घोषणा देत निवडणूक कार्यालयात गेला. निवडणूक कार्यालयाच्या मुख्य गेटमधून आत येताच नेकी का काम आंदेकर का नाम अशा घोषणांना बंडू आंदेकरने सुरुवात केली. बघा बघा मला लोकशाहीत कसं आणलंय, मी उमेदवार आहे दरोडेखोर नाही, असे म्हणत त्याने सहानुभूती मिळविण्याचा प्रयत्न केला. तसेच आंदेकरांना मत म्हणजे विकास कामाला मत, वनराज आंदेकर जिंदाबाद अशाही घोषणा त्याने यावेळी दिल्या.

संजीवनी कोमकर यांनी दिला होता इशारा :

4 दिवसांपूर्वी आंदेकर टोळीनं हत्या केलेल्या आयुष कोमकरची आई संजीवनी कोमकर यांचा एक व्हिडिओ सोशल मीडियावर व्हायरल झाला होता. या व्हिडिओत आयुषच्या आईनं सर्वच राजकीय पक्षांना आवाहन केलं होतं की, सर्व पक्षाच्या नेत्यांना माझी कळकळीची विनंती आहे, जर आम्हाला न्याय देता येत नसेल तर आमच्यावरती अन्याय तर करू नका. आंदेकरांना निवडणुकीचे तिकीट देऊ नका. माझ्या लहान मुलाचं त्यांनी आयुष्य उद्ध्वस्त केलं आहे. सत्तेची पॉवर त्यांच्याकडे आहे म्हणूनच ते या थराला पोहोचले असल्याचंही म्हटलं होतं. तसेच कोणत्याही पक्षाने त्यांना तिकीट दिल्यास मी त्यांच्या पक्ष कार्यालयासमोर आत्मदहन करणार असल्याचा इशाराही आयुषच्या आईनं दिला होता.