Pune University : पुणे विद्यापीठ प्राध्यापक भरती : 6 हजार उमेदवारांवर टांगती तलवार; तांत्रिक पेचामुळे 'करिअर' धोक्यात?

Pune News, 26 Apr : सावित्रीबाई फुले पुणे विद्यापीठातील रखडलेली प्राध्यापक भरती प्रक्रिया आता एका मोठ्या कायदेशीर आणि तांत्रिक पेचात अडकली आहे. अर्जातील 'एटीआर' शैक्षणिक, अध्यापन, संशोधन तपशील अपूर्ण असल्यामुळे तब्बल सहा हजार उमेदवारांचे अर्ज बाद होण्याची शक्यता निर्माण झाली असून, अर्ज केलेल्या उमेदवारांमध्ये मोठी खळबळ निर्माण झाली आहे.

नेमकं प्रकरण काय?

विद्यापीठातील १११ रिक्त जागांसाठी साधारण ९ हजार इच्छुकांनी अर्ज केले आहेत. मात्र, राज्य शासनाने भरती प्रक्रियेदरम्यान नियमावलीत तब्बल तीनवेळा बदल केले. सुरुवातीला गुणांचे सूत्र ८०:२० असे होते, जे नंतर बदलून ६०:२०:२० म्हणजेच संशोधन ६०, अध्यापन कौशल्य २०, मुलाखत २० असे करण्यात आले.

या नवीन निकषानुसार उमेदवारांना त्यांच्या संशोधन आणि अध्यापनाचा सविस्तर 'एटीआर' फॉर्म भरणे अनिवार्य होते. विद्यार्थ्यांनी अशाप्रकारे अनेक विद्यार्थ्यांनी फॉर्म भरलेले नाहीत. शासकीय निर्णयातील वारंवार होणारे बदल आणि माहितीचा अभाव यामुळे अनेक उमेदवारांनी जुन्याच पद्धतीने अर्ज भरले, तर काहींनी एटीआरचा रकाना रिकामाच ठेवला. आता याच तांत्रिक मुद्द्यावर ६० गुणांचे मूल्यांकन कसे करायचे, असा प्रश्न प्रशासनासमोर उभा ठाकला आहे.

उमेदवारांचे म्हणणे आहे की बदललेली नियमावली आणि तांत्रिक गुंतागुंत यामुळे हा प्रकार घडला आहे. त्यामुळे ही प्रक्रिया 'युजीसी'च्या मूळ नियमांनुसार व्हावी, अशी मागणी जोर धरत आहे. दरम्यान प्रशासन सुधारित ६०:२०:२० सूत्रावर ठाम असले तरी, एवढ्या मोठ्या संख्येने उमेदवार बाद झाल्यास भरतीवर प्रश्नचिन्ह उपस्थित होऊ शकते.

त्यामुळे एटीआर सादर न केलेले उमेदवार तांत्रिकदृष्ट्या अपात्र ठरत असले, तरी प्रशासकीय पातळीवर सकारात्मक हालचाली सुरू असल्याची चर्चा आहे. पात्र उमेदवारांना केवळ एका अर्जामुळे संधी नाकारण्याऐवजी, त्यांना त्रुटी सुधारण्यासाठी वेळ देता येईल का? याबाबत विद्यापीठ प्रशासन कायदेशीर सल्ला घेत असल्याचे सांगितले जात आहे.