Wagholi Accident : अमरावतीहून पुण्यात आलेल्या कामगारांसाठी रविवारची रात्र ठरली काळरात्र; 3 जणांचा चिरडून मृत्यू

Pune News: पुण्यात रविवारची मध्यरात्र अमरावतीवरुन आलेल्या कामगारांसाठी काळरात्र ठरली. पदपथावर झोपलेल्या 9 जणांना भरधाव डंपरने चिरडले. यात 3 जणांचा जागीच मृत्यू झाला. डंपर चालकाला पोलिसांनी अटक केली आहे.

रविवारी रात्री सुमारे 12.30 वाजण्याच्या सुमारास हा अपघात वाघोलीतील केसनंद फाटा येथे घडली. दोन चिमुरड्यासह एकाचा मृत्यू झाला. वैभवी रितेश पवार ( वय १ वर्ष ), वैभव रितेश पवार (वय २ वर्ष), रीनेश नितेश पवार (वय ३) अशी मृत्यू झालेल्यांची नावे आहेत.

अन्य सहा जण जखमी झाले आहेत. त्यांच्यावर ससून रुग्णालयात उपचार सुरु आहे. त्यांची प्रकृती गंभीर आहे. डंपर चालक दारु पिऊन गाडी चालवत असल्याची पोलिसांची प्राथमिक माहिती आहे.

फूटपाथवर एकूण 12 जण झोपले होते. तर बाकी फूटपाथच्या बाजूला झोपडीत झोपले होते.भरधाव डंपर सरळ फूटपाथवर चढून झोपलेल्या व्यक्तींच्या अंगावर गेला. यामध्ये तिघांचा जागीच मृत्यू झाला. तर सहाजण गंभीर जखमी झाले आहेत. यातीन तीन जणांची प्रकृती चिंताजनक आहे. या घटनेने वाघोली परिसरात हळहळ व्यक्त करण्यात येत आहे.