Rajya Sabha Election : रोहित पवारांच्या सुनेत्राकाकींना अ‍ॅडव्हान्समध्येच शुभेच्छा; म्हणाले, 'पळत्याच्या गळ्यात...'

Pune Political News : राज्यसभा निवडणुकीसाठी अर्ज भरण्याच्या आज (गुरुवार) शेवटचा दिवस आहे. त्यामुळे राष्ट्रवादी काँग्रेसकडून (अजित पवार गट) राज्यसभेच्या जागेसाठी कोणाची निवड होणार याकडे सर्वांचेच लक्ष लागला आहे.

सुरुवातीला पुण्यातून आणि नंतर बारामती मधून सुनेत्रा पवार यांना राज्यसभेवरती पाठवावे अशी मागणी राष्ट्रवादीच्या कार्यकर्त्यांकडून आणि पदाधिकाऱ्यांकडून करण्यात आली होती. या मागणीवर उपमुख्यमंत्री अजित पवार काय निर्णय घेणार याकडे सर्वांचेच लक्ष लागलं असतानाच राष्ट्रवादी काँग्रेस शरद पवार पक्षाचे आमदार रोहित पवार यांनी सुनेत्रा पवार आणि पार्थ पवार यांना अॅडव्हान्स मध्येच शुभेच्छा दिल्या आहेत.

राज्यसभेच्या निवडणुकीबाबत रोहित पवारांनी Rohit Pawar एक ट्विट केला आहे. या ट्विटमध्ये रोहित पवार म्हणाले, आदरणीय पवार साहेबांना सोडून एक वेगळं घर वसवलं गेलं असलं तरी त्या घरातील आजची परिस्थिती आणि तिथल्या लोकांची अस्वस्थता बघता सर्वजण किती दिवस एकत्र राहतील हे ब्रम्हदेवही सांगू शकणार नाही.

त्यामुळं पळत्याच्या गळ्यात राज्यसभा घालण्यापेक्षा घरातल्या विश्वासू व्यक्तीला दिली तरच ती टिकेल इतरांचा काही भरवसा नाही, अशी चर्चा सुरूय... म्हणूनच सुनेत्राकाकी किंवा पार्थ यांना Advance मध्ये शुभेच्छा आणि अभिनंदन!

राज्यसभेसाठी उमेदवारी दाखल करण्याचा आज (गुरुवार) शेवटचा दिवस असल्याने आजच उमेदवाराची घोषणा होणे अपेक्षित आहे. राष्ट्रवादी काँग्रेसच्या पुणे येथील वर्धापन दिनाच्या कार्यक्रमात शहराध्यक्ष दीपक मानकर यांनी सुनेत्रा पवार Sunetra pawar यांना राज्यसभेवरती पाठवून त्यांना राज्यमंत्री करावे असा ठराव करून तो अजित पवारांकडे पाठवला होता.

नंतर बारामती मधील काटेवाडीतून देखील राष्ट्रवादीच्या स्थानिक कार्यकर्त्यांनी पदाधिकाऱ्यांनी सुनेत्रा पवार वहिनींना राज्यसभेवरती पाठवा, अशी मागणी अजित पवारांकडे केली होती. त्यामुळे अजित पवार राज्यसभेच्या उमेदवारीसाठी कोणाची निवड करणार याची उत्सुकता शिगेला पोहोचली आहे.

राष्ट्रवादी काँग्रेसचे ज्येष्ठ नेते प्रफुल्ल पटेल यांनी राजीनामा दिल्यानंतर रिक्त झालेल्या जागेसाठी राष्ट्रवादी मधून विविध नावे चर्चेत आहेत त्यामध्ये प्रामुख्याने सुनेत्रा पवार, पार्थ पवार आणि बाबा सिद्दीकी, समीर भुजबळ आणि नितीन पाटील यांच्या नावाची चर्चा आहे.

(Edited By Roshan More)