BJP Vs MNS : 'मनसेमुळे महायुतीला काहीच फायदा नाही,आता त्यांना एकही जागा मिळणार नाही!'; भाजप आमदारानं ठणकावलं

Vidarbha News : लोकसभा निवडणुकीत राज ठाकरे यांच्या महाराष्ट्र नवनिर्माण सेनेनं पंतप्रधान नरेंद्र मोदींना बिनशर्त पाठिंबा जाहीर केला होता.एवढंच नाही तर राज ठाकरेंनी महायुतीच्या उमेदवारांसाठी सभाही घेतल्या होत्या.पंतप्रधान नरेंद्र मोदींसोबत एका स्टेजवरही आले होते.पण आता भाजप- मनसे खटके उडण्याची शक्यता आहे.

भाजप आमदाराने चक्क मनसेवर गंभीर आरोप केले आहेत. मनसे नेते राजू उंबरकर यांचा विदर्भात महायुतीला एका रुपयाचाही फायदा झाला नसल्याचा दावा करत या ठिकाणी एकही मतदारसंघ मनसेला मिळणार नाही, असा पवित्रा वणी मतदारसंघाचे भाजपचे आमदार संजीवरेड्डी बोडकुरवार यांनी घेतला आहे. त्यामुळे आता भाजप-मनसेमध्ये नवा वाद पेटण्याची शक्यता आहे.

राज ठाकरेंच्या (Raj Thackeray) बिनशर्त पाठिंब्यानंतर मनसे नेते राजू उंबरकर यांनी विदर्भात मनसे पूर्ण ताकदिनीशी महायुतीच्या उमेदवाराला विजयी करणार असल्याचा विश्वास व्यक्त केला होता.तसेच त्यांनी चंद्रपूर लोकसभा मतदारसंघात भाजप उमेदवार सुधीर मुनगंटीवारांच्या प्रचारात मनसेने पुढाकार घेतला होता.

तसेच उंबरकर यांच्यासह मोठ्या प्रमाणात मनसे कार्यकर्ते उपमुख्यमंत्री देवेंद्र फडणवीस यांच्या विजय संकल्प सभेलाही उपस्थित होते असे असतानाही भाजप आमदार संजीवरेड्डी बोडकुरवार यांनी घेतलेल्या आक्रमक भूमिकेमुळे लोकसभेच्या निकालानंतर आधीच बॅकफूटवर गेलेल्या महायुतीसमोर नवं संकट उभं ठाकलं आहे.

बोडकुरवार म्हणाले,आगामी निवडणुकांमध्ये वणी मतदारसंघ मनसेला दिला, तर आम्ही त्याचा प्रचंड विरोध करणार असल्याचेही ते म्हणाले. वणीमध्ये मनसेची मोठी ताकद असून चंद्रपुरातही मनसेने चांगलंच जाळं विस्तारलं आहे,त्यामुळे महायुतीच्या उमेदवाराला बळ मिळेल, अशी अपेक्षा होती. मात्र, या मतदारसंघात मनसेचा(MNS) कुठलाही फायदा महायुतीला झाला नाही असा दावा करुन त्यांनी एकच खळबळ उडवून दिली आहे.

भाजपकडून विधानसभा निवडणुकीत उमेदवारी जाहीर करताना प्रत्येक उमेदवारांचं अवलोकन आणि सर्व्हे होणार आहे. गेल्या पाच वर्षांत केलेली कामं आणि जनमताचा कौल ठरवूनच वरिष्ठ उमेदवारी देणार असल्याचे विधानही संजीव रेड्डी बोडकुरवार यांनी केली आहे.