Shankar Mandekar: "मी किर्तनात असतो, माझा भाऊ कला केंद्रावर गेला हे शॉकींग"; गोळीबार प्रकरणावर आमदार मांडेकरांनी पहिली प्रतिक्रिया

Shankar Mandekar: दौंड तालुक्यातील चौफुला इथल्या अंबिका कला केंद्रावर झालेल्या गोळीबार प्रकरणामध्ये अजित पवारांच्या राष्ट्रवादीचे आमदार शंकर मांडेकर यांचा भाऊ बाळासाहेब मांडेकर यांचं नाव समोर आलं आहे. पोलिसांनी त्यांच्यासह आणखी दोन जणांना ताब्यात घेतलं आहे. गेल्या दिवसांपासून राज्यात या प्रकरणाची जोरदार चर्चा आहे. राजकीय दबावापोटी हे प्रकरण दाबण्याचा प्रयत्न करण्यात येत असल्याचा आरोप विरोधकांकडून करण्यात येत आहे. या पार्श्वभूमीवर आमदार शंकर मांडेकर यांनी पहिल्यांदाच आपली भूमिका स्पष्ट केली आहे.

पुण्यात माध्यमांशी बोलताना भोरचे आमदार शंकर मांडेकर म्हणाले, "पोलिसांच्या माध्यमातून मला ही माहिती कळाली त्यानंतर मी पोलिसांना रीतसर कारवाई करा सांगितलं. या प्रकरणांमध्ये मी कुणालाही फोन केला नसून मी कोणताही दबाव आणलेला नाही. कालपर्यंत या प्रकरणाबाबत मला देखील माहिती नव्हतं, काल पोलिसांचा फोन आल्यानंतर हे प्रकरण मला समजलं. पोलिसांकडून या प्रकरणाबाबत माहिती मिळाल्यानंतर मीच माझ्या भावाला पोलीस स्टेशनला हजर व्हायला सांगितलं होतं. याबाबत उपमुख्यमंत्री अजित पवार यांच्यासोबत माझं कसलंही बोलणं झालेलं नाही.

गोळीबार कोणी केला? याबाबत मला माहिती नाही. माझ्या भावाकडे बंदूक परवाना नाही. भावासोबत जे काही दोन-तीन व्यक्ती होते त्यांच्यातील गणपत जगताप नामक व्यक्तीकडं तो बंदूक परवाना आहे. माझा भाऊ समाजकार्य करतो, शेती पाहतो, वारकरी संप्रदायाच काम करतो. पण देखील किर्तनात असतो पण माझा भाऊ कला केंद्रावर गेला खूपच शॉकिंग आहे. आपण कसं वागायचं हे ठरवलं पाहिजे, माझा भाऊ त्यांच्याबरोबर गेला हे चुकीच आहे. घडलेली घटना निंदनीय आहे, कारवाई झालीच पाहिजे. चार भाऊ असतात त्यातला एक चोर असतो, एक देव असतो. चुकीचं प्रायश्चित्त शासन त्याला देईल, अशा शब्दांत आमदार मांडेकर यांनी खंत व्यक्त केली आहे.

या प्रकरणामध्ये मी कोणत्याही दबाव टाकलेला नाही. ज्यानं कोणी चुकी केली असेल त्यांच्यावर कारवाई व्हावी ही आमची भूमिका आहे. पाठीशी घालण्यासाठी मी पोलिसांना फोन केलेला नाही. त्यांच्यावर रीतसर कारवाई करा, तो माझा भाऊ असला तरी मी मध्ये येणार नाही असंही आमदार मांडेकर यांनी स्पष्टपणे सांगितलं आहे.