Shivsena News: महापालिका गमावली, आता 'मोठा भाऊ' भाजपला झटका देण्यासाठी 'धाकट्या' शिंदेंची झाली एन्ट्री; पुण्यात टाकणार नवा डाव

Pune News : आगामी तीन वर्षांमध्ये कोणत्याही निवडणुका नसल्याने या काळात पक्ष संघटना मजबूत करण्याच्या दृष्टिकोनातून उपमुख्यमंत्री एकनाथ शिंदे यांच्या शिवसेनेने पावले टाकण्यास सुरुवात केली आहे. या दृष्टीकोनातून खासदार श्रीकांत शिंदे हे राज्यातील विविध भागांचा दौरा करत असून नव्याने संपर्क प्रमुखांच्या नेमणुका देखील करण्यात येत आहेत.

अशीच एक बैठक श्रीकांत शिंदे यांच्या उपस्थितीत पुण्यामध्ये झाली. या बैठकीला पुण्यातील स्थानिक पदाधिकाऱ्यांसह पुण्याचे संपर्क प्रमुख आणि उद्योग मंत्री उदय सामंत, पाणी पुरवठा मंत्री गुलाबराव पाटील आणि आमदार शरद सोनवणे हे उपस्थित होते.

श्रीकांत शिंदे म्हणाले, विधानसभा निवडणुकीत पक्षाला उत्कृष्ट यश मिळाल्यानंतर, नगरपालिका निवडणुकीत नगराध्यक्ष पक्षाच्या वतीने निवडून आले. मात्र, महापालिका निवडणुकीत काही ठिकाणी अपेक्षित यश मिळाले नाही. या ठिकाणी पक्ष संघटन अधिक मजबूत करण्याच्या सूचना पक्षाचे नेते व उपमुख्यमंत्री एकनाथ शिंदे यांनी दिल्या आहेत.

यासाठी राज्यभरातील शिवसेनेची नव्या संपर्कप्रमुखांची नियुक्ती करण्यात आली आहे. हे संपर्कप्रमुख आपापल्या क्षेत्रात आढावा बैठका घेत असून, पक्षांतर्गत मतभेद कमी करण्याचा प्रयत्न करत असल्याचं श्रीकांत यांनी शिंदे यांनी स्पष्ट केलं.

पक्षातील वरिष्ठ पदाधिकाऱ्यांमुळे पुणे महापालिकेमध्ये पराभव स्वीकारावा लागला. मात्र, या पराभवानंतर देखील कुठल्याही वरिष्ठ पदाधिकाऱ्यांनी जबाबदारी स्वीकारून राजीनामा दिला नाही. त्या उलट खालील पदाधिकाऱ्यांची कार्यकारिणी बरखास्त करण्यात आली आहे. त्यामुळे आता आम्ही काम कसं करायचं अशी विचारणार हे पदाधिकारी करताना पाहायला मिळत आहे.

त्यामुळे पुढील तीन वर्षांमध्ये भाजपला तोडीस तोड देणारी संघटक रचना करण्याचा शिवसेनेचा मानस हा अंतर्गत गटबाजीमुळे कितपत यशस्वी होणार हे पाहणं महत्त्वाचं ठरणार आहे.