Sonali Bendre : सोनाली बेंद्रे अडचणीत! मावळच्या शेतकऱ्याने थेट कोर्टात खेचलं; नेमकं प्रकरण काय?

बॉलिवूड चित्रपटसृष्टीतील प्रसिद्ध मराठी अभिनेत्री सोनाली बेंद्रे आणि तिचे पती गोल्डी बेहल सध्या एका जमीन वादामुळे अडचणीत सापडले आहेत. पुणे जिल्ह्यातील मावळ तालुक्यातील तब्बल 30 गुंठे जमिनीच्या व्यवहारावरून त्यांच्याविरोधात न्यायालयात दावा दाखल करण्यात आला आहे. वडगाव मावळ येथील न्यायालयात चंद्रकांत बाळू शिंदे यांनी हा दावा केला असून, या व्यवहारात फसवणूक आणि नियमांचे उल्लंघन झाल्याचा आरोप करण्यात आला आहे.

तक्रारदाराच्या म्हणण्यानुसार, मौजे उकसान येथील सर्व्हे नंबर 121/1 मधील ही जमीन त्यांच्या कुटुंबाच्या वहिवाटीतील असून 1 एप्रिल 1957 पासून त्यांच्या आजोबांच्या नावावर आहे. या जमिनीवर कुळ हक्क असल्याचा दावा करण्यात आला आहे.

मात्र, मूळ मालकाने ही जमीन बेकायदेशीरपणे दुसऱ्या व्यक्तीला विकली आणि नंतर तीच जमीन पुढे सोनाली बेंद्रे आणि गोल्डी बेहल यांच्याकडे हस्तांतरित करण्यात आल्याचा आरोप आहे. तसेच डिसेंबर 2025 मध्ये या जागेवर प्रत्यक्ष भेटीदरम्यान वाद झाल्याचाही उल्लेख दाव्यात करण्यात आला आहे.

दरम्यान, सोनाली बेंद्रे आणि गोल्डी बेहल यांच्या बाजूने हे सर्व आरोप फेटाळले आहेत. सोनाली बेंद्रे यांच्या नावावर ही जमीन नसून त्यांचा या व्यवहाराशी थेट संबंध नसल्याचा दावा त्यांच्या वकिलांनी केला आहे. तसेच 8 जून 1965 रोजी तत्कालीन तहसीलदारांनी दिलेल्या आदेशानुसार संबंधित व्यक्ती ही जमीन मालकी हक्काची नसल्याचे स्पष्ट झाल्याचेही सांगण्यात आले आहे.

यापूर्वीही या प्रकरणावर अनेक वेळा प्रशासकीय स्तरावर सुनावणी झाली असून, प्रत्येक वेळी निर्णय तक्रारदाराच्या विरोधात गेला असल्याचा बचाव पक्षाचा दावा आहे. त्यामुळे हे प्रकरण केवळ आर्थिक फायदा मिळवण्यासाठी वारंवार पुढे आणले जात असल्याचा आरोपही करण्यात आला आहे. आता या संपूर्ण वादावर न्यायालयाचा अंतिम निर्णय काय येतो, याकडे सर्वांचे लक्ष लागले आहे.