Tukaram Mundhe: तुकाराम मुंढेंची आता पुण्याच्या मार्केट यार्डातही धडक! आठ लाखांची हळद, तीळ, सोयाबीनचा साठा जप्त

- ज्ञानेश्वर भोंडे

पुणे : शहरातील मार्केट यार्ड परिसरातील घाऊक अन्नधान्य व मसाला व्यवसायही आता अन्न व औषध प्रशासनाच्या (एफडीए) रडारवर आले आहेत. भेसळीविरोधातील ‘एफडीए’च्या विशेष मोहिमेत मार्केट यार्डातील बी. जी. गोयल अँड कंपनी येथे टाकलेल्या छाप्यात तब्बल ८ लाख १४ हजार ६३० रुपयांची हळद पावडर, तीळ आणि सोयाबीनचा साठा जप्त करण्यात आला. शहरातील प्रमुख घाऊक बाजारपेठेत झालेल्या या कारवाईमुळे इतर व्यापाऱ्यांमध्येही खळबळ उडाली आहे.

तपासणीदरम्यान 'संत' व 'साधू' ब्रँडच्या हळद पावडरीसह तीळ आणि सोयाबीन तेलाचे नऊ नमुने तपासणीसाठी घेण्यात आले. संबंधित साठा भेसळीच्या संशयावरून जप्त करण्यात आला असून प्रयोगशाळेचा अहवाल आल्यानंतर पुढील कायदेशीर कारवाई करण्यात येणार आहे. त्यामध्ये तपासणीत परवान्यावरील आवश्यक बदल न केल्याचे, तसेच अन्न सुरक्षा व मानके कायद्यातील विविध तरतुदींचे पालन न झाल्याचेही आढळून आले. अन्न सुरक्षा नियमांचे उल्लंघन आणि परवान्यातील त्रुटी आढळल्याने संबंधित आस्थापनेला व्यवसाय बंद ठेवण्याची नोटीस बजाविण्यात आली आहे.

दरम्यान, पुणे विभागात अन्य ठिकाणीही अन्नभेसळ व प्रतिबंधित पदार्थांविरोधात कारवाया करण्यात आल्या. सांगली जिल्ह्यातील मिरज तालुक्यात दोन ठिकाणी दूध भेसळीप्रकरणी कारवाई करून संशयित दूध नष्ट करण्यात आले, तर संबंधितांविरुद्ध गुन्हे दाखल करण्यात आले. पुण्यातील बोपोडी आणि कोल्हापूर जिल्ह्यातील दोन ठिकाणी प्रतिबंधित गुटखा व इतर अन्नपदार्थांचा २२ हजार ७८९ रुपयांचा साठा जप्त करून संबंधितांविरुद्ध गुन्हे दाखल करण्यात आले.

पुणे विभागात या कारवायांमध्ये एकूण ८ लाख ३३ हजार ३९१ रुपयांचा संशयित अन्नपदार्थांचा साठा जप्त करण्यात आला असून, भेसळ आणि नियमभंग करणाऱ्या अन्न व्यवसायांवर पुढील काळातही कठोर कारवाई सुरू राहणार असल्याचे अन्न व औषध प्रशासनाने स्पष्ट केले.