Vinayak Raut: विनायक राऊतांना अटक होण्याची शक्यता! कोर्टानं फेटाळला जामीन अर्ज; सुनेचा छळ प्रकरणात अडचणी वाढल्या

Vinayak Raut: सुनेचा छळ केल्याप्रकरणी माजी खासदार विनायक राऊत आणि त्यांचे पुत्र गितेश राऊत यांना कोणत्याही क्षणी अटक होण्याची शक्यता निर्माण झाली आहे. कारण ठाण्यातील सत्र न्यायालयानं त्यांचा अंतरिम जामीन अर्ज फेटाळला आहे. तसंच त्यांना अटकेपासून संरक्षणासंदर्भात कुठलंही भाष्य केलेलं नाही. त्यामुळं दोघा पितापुत्रांच्या अडचणीत वाढ झाली आहे.

कोर्टात काय घडलं?

कोर्टानं विनायक राऊत यांच्या अंतरिम जामीन अर्जावर सुनावणी करताना म्हटलं की, याचिकाकर्त्यांच्या वकिलांचा अर्ज अभ्यासून त्यांचा युक्तिवादही आम्ही ऐकून घेतला. राऊत पिता-पुत्रांवर एफआयआरमध्ये अत्यंत गंभीर आरोप करण्यात आले आहेत. त्यामुळं याचिकाकर्त्यांना अंतरिम संरक्षण किंवा अटकेपासून तात्पुरता दिलासा देण्यासारखं कोणतेही ठोस कारण दिसत नाही. त्यामुळं अंतरिम संरक्षणाची ही मागणी फेटाळण्यात येत आहे. मुख्य जामीन अर्जावर उत्तर देण्यासाठी प्रतिवादीला नोटीस जारी करण्याचे आदेशही कोर्टानं यावेळी दिले. तसंच या प्रकरणाची पुढील सुनावणी ६ जुलै २०२६ निश्चित केली.

दरम्यान, न्यायालयाने विनायक राऊतांना तात्काळ दिलासा देण्यास नकार दिल्यामुळं तसंच पुढील सुनावणीपर्यंत अटक न करण्यासंदर्भात कुठलेही निर्देश पोलिसांना दिलेले नसल्यानं पोलीस त्यांना चौकशीसाठी २३ तारखेच्या आधी कधीही ताब्यात घेऊ शकतात. त्यामुळं त्यांच्यावर अटकेची टांगती तलवार कायम आहे.

७ जणांवर गुन्हा दाखल

दरम्यान, विनायक राऊत यांची सून गिरीज राऊत यांनी नुकतीच पत्रकार परिषद घेत राऊत कुटुंबियांवर छाळाचे गंभीर आरोप केले होते. या प्रकरणी गिरीजा राऊत यांच्या तक्रारीनुसार, ठाकरेंच्या शिवसेनेचे माजी खासदार विनायक राऊत, त्यांची पत्नी, मुलगा मुंबई महापालिकेतील नगरसेवक गितेश राऊत आणि इतर लोक अशा ९ जणांवर गुन्हा दाखल करण्यात आला आहे. या प्रकारानंतर महाराष्ट्रात एकच खळबळ उडाली.