Rajendra Hagawane : पसार झालेल्या राजेंद्र हगवणेला कर्नाटकच्या माजी मंत्र्याची 'छत्रछाया' कशी? दोघांनाही होता एकच 'शौक'

Vaishnavi Hagawane : वैष्णवी हगवणे आत्महत्या प्रकरणात अटक केलेल्या आरोपींची संख्या आता 11 झाली आहे. यात कर्नाटकचे माजी उर्जामंत्री वीरकुमार पाटील यांचा मुलगा प्रीतम पाटील यालाही अटक केली आहे. राजेंद्र हगवणे आणि सुशील हगवणे हे दोघेही फरार असताना कोगनोळी येथील एका रिसॉर्टवर त्यांच्या निवासाची व्यवस्था करून दिल्याचा आरोप प्रीतम पाटीलवर आहे.

पण कर्नाटकच्या प्रीतम पाटील आणि मुळशीच्या राजेंद्र हगवणे नेमकी ओळख कशी झाली? असा प्रश्न आहे. मिळालेल्या माहितीनुसार, राजेंद्र हगवणे याला पिस्तूल बाळगणे, महागड्या गाड्यांमधून फिरणे, परदेशी जातीचे कुत्रे पाळणे असे अनेक मोठे शौक होते. यापैकीच होता अश्व पालनाचा शौक. हगवणेंच्या घरी एक काळा घोडाही होता.

याशिवाय एका पांढऱ्या घोड्यावरून फिरताना सुशील हगवणेचा एक व्हिडीओही व्हायरल होत आहे. यात तो मुजोरपणे बापाच्या जीवावर ऐश करतोय असे म्हणत असल्याचे ऐकू येते. हगवणे यांच्याकडे काम करणारे केअरटेकर आता पाळलेला घोडा आणि कुत्रा यांची काळजी घेत आहेत. तसेच त्यांच्या घराचीही देखभाल करत आहेत.

दरम्यान, अटक करण्यात आलेल्या प्रीतम पाटील यालाही अश्व पालनाचा असाच शौक होता. याच शौकमधून प्रीतम आणि राजेंद्र हगवणे यांनी ओळख झाली आणि मैत्रीही वाढली. फरार झाल्यानंतर राजेंद्र हगवणे याने प्रीतमला संपर्क केला. त्यानंतर प्रीतमने दोघांनाही सीमा भागातील हेरिटेज हॉटेलला वास्तव्यासाठी ठेवले होते. प्रीतम पाटील याने दोघांनाही 2 ते 3 दिवस मदत केल्याचा संशय आहे.

प्रीतम पाटीलसह अन्य पाच जणांना पोलिसांनी (Police) अटक केली आहे. उत्तम भेगडे (वय 60, रा. वडगाव मावळ), बंडू लक्ष्मण फाटक (वय 55, रा. लोणावळा), अमोल विजय जाधव (वय 35, रा. पुसेगाव, ता. खटाव, जि. सातारा), राहुल दशरथ जाधव (वय 45, रा. पुसेगाव, ता. खटाव, जि. सातारा) यांना अटक केली आहे. या सर्वांना मंगळवारी न्यायालयात हजर केले जाणार आहे.