Vaishnavi Hagavane : सुप्रिया सुळेंना विरोध अन् सुनेत्रा पवारांना समर्थन..., वैष्णवी हगवणेच्या दीराची 'ती' पोस्ट व्हायरल होताच नेटकरी संतापले

Pune News, 27 May : पुण्यातील वैष्णवी हगवणे आत्महत्या प्रकरणामुळे संपूर्ण राज्यात खळबळ उडाली आहे. हुंड्यासाठी सुनांचा छळ करणाऱ्या हगवणे कुटुंबियांवरोधात तीव्र संताप राज्यभरातून व्यक्त केला जात आहे. शिवाय या सर्व घटनेनंतर हगवणे परिवाराला मोठ्या प्रमाणात पैशाचा माज असल्याचंही उघडकीस आलं आहे.

वैष्णवीचे सासरे राजेंद्र हगवणे आणि दीर सुशील हगवणे या दोघांना राजकीय पाठबळ असल्याचंही उघडकीस आलं आहे. मात्र, वैष्णवीच्या मृत्यूनंतर या दोघांची राष्ट्रवादी काँग्रेस (अजित पवार) पक्षातून हकालपट्टी करण्यात आली आहे. याबाबतची राष्ट्रवादीकडून नोटीस काढण्यात आली होती.

दरम्यान, सुनांचा छळ करणारं कुटुंब अशी हगवणे यांची ओळख सबंध महाराष्ट्रात झाली असतानाच आता वैष्णवीचा दीर सुशील हगवणे याने 2024 मध्ये अजित पवारांची पत्नी सुनेत्रा पवार यांना मतदान करण्याचं आवाहन करताना केलेली एक पोस्ट सध्या चर्चेत आली आहे.

पोस्टमध्ये नेमकं काय?

या पोस्टमध्ये त्याने सूना सुद्धा इतिहास घडवू शकतात हे जगाला दाखवून देऊया, असं लिहिलं आहे. त्यावरून नेटकऱ्यांनी विविध कमेंट्स करत संताप व्यक्त केला आहे. सुशील हगवणे हा मागील वर्षी पार पडलेल्या लोकसभा निवडणुकी दरम्यान सुनेत्रा पवार यांच्या प्रचार सभेत आल्याचं दिसत आहे. या पोस्टमध्ये त्याने सुप्रिया सुळेंऐवजी सुनेत्रा पवारांना मतदान करण्याचं आवाहन केलं आहे.

बारामतीत नणंद विरूद्ध भावजय अशी लढत झाली होती. यावेळी शरद पवारांची लेक सुप्रिया सुळे आणि सुन सुनेत्रा पवार असं चित्र निर्माण झालं होतं. याच पार्श्वभूमीवर त्याने पोस्टमध्ये लिहिलं की, "यावेळी लेकीला नाही तर सुनेला निवडून आणुया. सूना घराबाहेर पडल्या तर स्वतःचं साम्राज्य पण उभारू शकतात, सूना सुद्धा इतिहास घडवू शकतात हे जगाला दाखवून देऊया, एक मत सुनेसाठी..."

तर घरातील दोन्ही सुनांचा छळ करून बाहेर केवळ देखाव्यासाठी सुनांचं कौतुक करणाऱ्या सुशील हगवणेच्या पोस्टवर नेटकरी कमेंटच्या माध्यमातून संताप व्यक्त करत आहेत. लोका सांगे ब्रह्मज्ञान आणि स्वत: कोरडे पाषाण, असं हगवणे कुटुंब वागत असल्याचं नेटकरी म्हणत आहेत. दरम्यान, वैष्णवीला आत्महत्येस प्रवृत्त केल्या प्रकरणी तिच्या सासरच्या पाच जणांना अटक करण्यात आली आहे. यामध्ये सासरा, दीर, सासू, नणंद आणि वैष्णवीचा नवरा यांना पोलिसांनी अटक केली आहे.