Vaishnavi Hagwane Case : घोड्यावर बसून सुशील हगवणेचा माज... म्हणे, "बापाच्या जीवावर करतोय"; मुजोरीचा VIDEO व्हायरल

Pune News, 27 May : वैष्णवी हगवणे आत्महत्या प्रकरणाने संपूर्ण राज्यात खळबळ उडवून दिली असतानाच, या प्रकरणातील मुख्य आरोपी असलेल्या सुशील हगवणे आणि राजेंद्र हगवणे यांचा एक जुना व्हिडिओ सध्या सोशल मीडियावर मोठ्या प्रमाणात व्हायरल होत आहे.

पुण्यातील (Pune) वैष्णवी हगवणे आत्महत्या प्रकरणात संपूर्ण हगवणे कुटुंब अटकेत असताना, आता सुशील हगवणे आणि राजेंद्र हगवणे यांचा एक जुना व्हिडीओ समोर आला आहे. या व्हिडिओमध्ये पिता पुत्राचा मुजोर माज स्पष्टपणे दिसत असल्याच्या प्रतिक्रिया सध्या सोशल मीडियावर नेटकरी देत आहेत.

व्हिडिओमध्ये नेमकं काय?

या व्हिडिओत सुशील हगवणे घोड्यावर बसलेला असून राजेंद्र हगवणे देखील त्याच्यासोबत आहे. या व्हिडिओत तो म्हणतोय की, "माझ्या बापाच्या जीवावर हवा करतोय, तुमच्या बापात दम असेल तर तुम्ही पण करा!" तर ही भाषा म्हणजे वर्चस्व गाजवण्याची आणि धमकी देणारी असल्याचं स्पष्ट दिसत आहे.

आश्चर्याची बाब म्हणजे राजेंद्र हगवणे देखील या व्हिडीओत सुशीलसोबत दिसत आहे. वैष्णवी हगवणे मृत्यू प्रकरणात पोलिसांनी सुरूवातीला तिच्या पतीसह सासू, नणंदेला अटक केली होती. त्यानंतर फरार सासरा राजेंद्र हगवणे आणि दीर सुशील हगवणे यांच्या देखील पोलिसांनी मुसक्या आवळल्या.

यानंतर तपासात राजेंद्र हगवणे आणि सुशील हगवणे यांना फरार होण्यासाठी मदत करणाऱ्या पाच जणांची नावं पुढे आली, त्यात एका माजी मंत्र्याच्या मुलाचाही समावेश आहे. सर्व आरोपींना पोलिसांनी अटक केली असून न्यायालयीन प्रक्रियेत ते सध्या कोठडीत आहेत.