Jalinder Supekar News : कैद्यांकडून जामिनासाठी मागितले तब्बल 550 कोटी! हगवणेंचे मामा सुपेकरांवर आणखी एक गंभीर आरोप

Pune News : वैष्णवी हगवणे मृत्यू प्रकरणातील संशय वाढत असताना, आता हगवणे कुटुंबीयांचे नातेवाईक आणि वरिष्ठ पोलीस अधिकारी जालिंदर सुपेकर यांच्यावर आणखी एक खळबळजनक आरोप करण्यात आला आहे. अमरावती कारागृहात बंदिस्त असलेल्या नानासाहेब गायकवाड आणि गणेश गायकवाड या कैद्यांकडून सुपेकर यांनी तब्बल 550 कोटी रुपयांची खंडणी मागितल्याचा गंभीर आरोप करण्यात आला आहे.

जालिंदर सुपेकर हे विशेष पोलीस महानिरीक्षक (कारागृह) या पदावर कार्यरत असताना, 19 ऑगस्ट 2023 रोजी त्यांनी अमरावती कारागृहाला भेट दिली होती. यावेळी त्यांनी गायकवाड बंधूंना भेटून त्यांना जामिनासाठी मदत करण्याच्या नावाखाली 500 कोटी रुपयांची मागणी केली, असा दावा करण्यात आला आहे.

या आरोपाची अधिकृत तक्रार गायकवाड यांचे वकील ॲड. निवृत्ती कराड यांनी न्यायालयात सादर केली आहे. त्यांनी कोर्टात दाखल केलेल्या निवेदनात असे नमूद केले आहे की, “सुपेकर यांनी स्पष्ट शब्दांत धमकी दिली की, ‘हे सगळं मीच केलं आहे. मीच तुम्हाला अडकवलं आहे. जर पैसे दिले नाहीत, तर तुम्हाला बाहेर येऊ देणार नाही.”

तक्रारीत असेही नमूद आहे की, 2024 मध्ये सुपेकर पुन्हा एकदा अमरावती जेलमध्ये आले असता, त्यांनी नानासाहेब आणि गणेश गायकवाड यांना  मारहाण केली आणि पुन्हा एकदा खंडणीसाठी दबाव टाकला. “मी पुढच्या लोकांना पैसे देतो आणि तुमचं काम करून घेतो. पण त्यासाठी मला पैसे द्या, नाहीतर तुम्हाला कधीच बाहेर येऊ देणार नाही,” अशी धमकी त्यांनी दिल्याचा दावा करण्यात आला आहे.

पोलीस खात्यातील वरिष्ठ अधिकारी असल्यामुळे सुपेकर यांच्या विरोधातील या तक्रारीकडे विशेष गांभीर्याने पाहिले जात आहे. या प्रकरणाची चौकशी न्यायालयाच्या आदेशानुसार सुरु होण्याची शक्यता आहे. पोलीस विभागात उच्च पातळीवरुन चौकशीसाठी विशेष समिती नेमली जाऊ शकते. सध्या या प्रकरणातील सर्व बाबी न्यायप्रविष्ट आहेत.