Sharad Pawar : योगी आदित्यनाथ यांचे शिवरायांबाबत विधान; शरद पवारांचे सडेतोड उत्तर, काय आहे प्रकरण?

Maharashtra Political News : उत्तर प्रदेशचे मुख्यमंत्री योगी आदित्यनाथ यांनी छत्रपती शिवाजी महाराजांबद्दल वादग्रस्त विधान केले आहे. रामदास स्वामी शिवरायांचे गुरू होते, या आशयाचे वक्तव्य केल्याने राज्यातील विरोधक आक्रमक झाल्याचे पाहायला मिळत आहेत. योगी आदित्यनाथ यांच्या या विधानाचा राष्ट्रवादी काँग्रेस (एसपी)चे अध्यक्ष, ज्येष्ठ नेते शरद पवारांनी समाचार घेतला आहे.

मुख्यमंत्री योगी आदित्यनाथ यांनी पुण्यातील आळंदी येथील गीता भक्ति अमृत महोत्सवात उपस्थित होते. यावेळी आदित्यनाथ यांनी शांतीगिरी महाराज यांची समर्थ रामदास यांच्याशी तुलना केली. यावेळी त्यांनी शिवाजी महाराजांबाबत एक विधान केले. समर्थ रामदासांनी शिवरायांना ज्या पद्धतीने मार्गदर्शन केले त्याच पद्धतीने शांतीगिरी महाराज मार्गदर्शन करतात, असे आदित्यनाथ (Yogi Adityanath) म्हणाले. यावरून राज्यातील विरोधकांनी टीकेची झोड उठवली आहे.

योगी आदित्यनाथ यांच्या वक्तव्यावर ज्येष्ठ नेते शरद पवारांनी (Sharad Pawar) जोरदार टीका केली आहे. महाराष्ट्राच्या भूमित समर्थ रामदासांनी शिवरायांना घडवले. ते त्यांना मार्गदर्शन करत होते, असे सांगणे म्हणजे माता जिजाऊ यांचे शिवरायांच्या जडणघडणीतील अस्तित्व नाकारण्यासारखेच आहे. जिजामाता यांचे कर्तृत्व आता दुसऱ्यांना देण्याचे काम सुरू असल्याची टीकाही पवारांनी केली.

(राजकारणातील महत्त्वाच्या बातम्यांचे अपडेट्ससाठी सरकारनामाचे अधिकृत WhatsApp चॅनल फॉलो करा!)

योगी आदित्यनाथ नेमके काय म्हणाले?

महाराष्ट्राला अनेक वर्षे संतांचा सहवास लाभल्याने येथील लोक भाग्यवान आहेत. समर्थ रामदास यांनी याच भूमित छत्रपती शिवाजी महाराजांना मार्गदर्शन केले. त्यानंतर शिवरायांनी मुगल बादशाह औरंगजेब यांना आव्हान दिले. आज कुणीही औरंगजेबचे नाव घेत नाही. छत्रपती शिवाजी महाराजांच्या रुपात भक्ती आणि शक्तीचा वास दिसतो. आपले मूळ छत्रपती शिवाजी महाराज आहेत, असेही ते म्हणाले.

(Edited by Sunil Dhumal)