Shivsena News : योगेश कदम टप्प्यात येताच केसरकर समर्थकांनी उट्टे काढले... सिंधुदुर्गात काय घडलं?

राज्याच्या मंत्रिमंडळात स्थान न मिळालेल्या शिवसेना आमदार दीपक केसरकर यांच्या नाराजीची गतवर्षी बरीच चर्चा झाली. मागच्या वर्षभरात केसरकर यांनी फारशी खळखळ न करता पक्षाचा निर्णय स्वीकारून कामाला सुरुवात केली. या दरम्यान, त्यांची हृदयविकाराची गंभीर शस्त्रक्रियाही पार पडली. आता केसरकर समर्थकांनी पुन्हा एकदा मंत्रि‍पदासाठी लॉबिंग सुरु केल्याची चर्चा आहे.

नुकतेच गृहराज्यमंत्री योगेश कदम सिंधुदुर्ग जिल्ह्याच्या दौऱ्यावर आले होते. यावेळी त्यांनी दीपक केसरकर यांची त्यांच्या निवासस्थानी जाऊन भेट घेतली. या भेटीवेळीच शिवसेनेच्या काही पदाधिकाऱ्यांनी योगेश कदम यांना अक्षरश: घेरले. शिवसेनेशी प्रामाणिक राहिलेल्या केसरकर यांना मंत्रिपद द्या, त्यांच्यावर अन्याय करू नका, त्यांना प्रवाहात सामावून घ्या, अशी आग्रही आणि आक्रमक मागणी कदम यांच्याकडे केली.

यावरून केसरकर यांनी आपल्या पदाधिकारी आणि कार्यकर्त्यांना समजावून सांगितले. त्यांची समजूत काढत मागणी करण्याची ही जागा नाही, असे सांगितले. पण कार्यकर्ते ऐकण्याच्या मनस्थितीत नव्हते. घरच्या बैठकीत, पत्रकार परिषदेमध्ये कार्यकर्त्यांचा हाच मूड दिसून आला. शिवसेनेच्या ज्येष्ठ नेत्या आणि माजी उपनगराध्यक्षा अनारोजीन लोबो, जिल्हाप्रमुख कविटकर हे सर्वच आग्रभागी होते.

पण ही मागणी योगेश कदम यांच्याकडे का करण्यात आली? असा प्रश्न सध्या पडत आहे. दीपक केसरकर म्हणाले त्याप्रमाणे मंत्रि‍पदाची मागणी करण्यासाठी कदम हे योग्य व्यक्ती नव्हते. कदम केवळ एक राज्यमंत्री आहेत. त्यांना मंत्रिमंडळातही फारसे अधिकार नाहीत आणि पक्षातही नाहीत. तरीही त्यांच्याकडेच का मागणी करण्यात आली?

शिवाय यापूर्वीही एकनाथ शिंदे यांच्यापासून उदय सामंत आणि अन्य शिवसेनेचे नेते सिंधुदुर्ग दौऱ्यावर येऊन गेले आहेत. पण अन्य कोणापुढेही केसरकर समर्थकांनी असा गोंधळ घातल्याचे ऐकिवात नाही. मग योगेश कदम यांनाच का टार्गेट केले? तर यामागे एक राजकीय कारण असल्याचे सांगितले जाते.

यापूर्वी शिंदे सरकारमध्ये कोकणातून उदय सामंत आणि दीपक केसरकर हे 2 मंत्री होते. आताच्या फडणवीस सरकारमध्ये कोकणात शिवसेनेचे 3 मंत्री आहेत. यात उदय सामंत, योगेश कदम या रत्नागिरी जिल्ह्यातील दोघांचा आणि रायगड जिल्ह्यातील भरत गोगावले यांचा समावेश होतो. कोकणातून योगेश कदम यांचा समावेश झाल्यानेच केसरकर यांना मंत्रिपद न मिळाल्याचे सांगितले जाते.

माजी मंत्री रामदास कदम यांनी सारी ताकद पणाला लावून केसरकरांकडील मंत्रिपद योगेश कदम यांना मिळवून दिल्याचे बोलले जाते. त्यामुळेच योगेश कदम सिंधुदुर्गमध्ये येताच केसरकर समर्थकांनी त्यांच्याकडेच मंत्रि‍पदाची मागणी लावून धरली. त्यांच्यासमोरच केसरकर समर्थकांनी शक्तिप्रदर्शन करून एकप्रकारे तुमच्यामुळेच आमचे मंत्रिपद हुकले असे दाखवून देण्याचा प्रयत्न केल्याची चर्चा आहे.