Patna News : पाटणा बिहार विधानसभा निवडणुकीनंतर अवघ्या चार महिन्यांतच तेजस्वी यादव यांना पक्ष एकसंध ठेवण्याची आणि आपली राजकीय क्षमता सिद्ध करण्याची संधी चालून आली आहे. बिहारमधील राज्यसभेच्या पाच जागा रिक्त होत आहेत. त्यापैकी दोन संयुक्त जनता दल (जेडीयू), तर एक राष्ट्रीय लोक मोर्चा (रालोमो) चे प्रमुख उपेंद्र कुशवाहा यांची आहे. राजदकडून प्रेमचंद गुप्ता आणि अमरेंद्र धारी सिंह निवृत्त होत आहेत.
सध्याच्या संख्याबळानुसार चार जागांवर एनडीएचा विजय निश्चित मानला जात आहे; पाचव्या जागेसाठी चुरस संभवते. विजयासाठी 41 आमदारांची गरज आहे. तेजस्वींना एक जागा जिंकण्यासाठी ऑल इंडिया मजलिस-ए-इत्तेहादुल मुस्लिमीन (AIMIM) आणि बहुजन समाज पक्ष (बसपा) यांचे समर्थन आवश्यक ठरणार आहे. विधानसभेत एआयएमआयएमचे पाच आमदार आहेत, तर महागठबंधनकडे एकूण 35 आमदार आहेत; त्यामुळे सहा मतांची कमतरता भासते.
एनडीएमध्येही अंतर्गत समीकरणे गुंतागुंतीची आहेत. भाजपाकडे 89 आमदार असून त्यांची कोणतीही जागा रिक्त होत नसली तरी दोन जागांचा लाभ संभवतो. जदयू कोट्यातील राज्यसभा उपसभापती हरिवंश नारायण सिंह आणि रामनाथ ठाकुर यांचा कार्यकाळ संपत आहे. मुख्यमंत्री नीतीश कुमार त्यांना तिसरी संधी देणार का?, हे पाहावे लागेल. रालोमोचे उपेंद्र कुशवाहा यांना भाजपाच्या पाठिंब्याविना पुन्हा राज्यसभेत जाणे कठीण आहे.
चिराग पासवान यांच्या लोक जनशक्ती पार्टी (रामविलास) (एलजेपी-रामविलास) कडे 19 आमदार आहेत. ते आपल्या आई रीना पासवान यांना उच्च सभागृहात पाठवू इच्छित असल्याची चर्चा आहे. भाजपाने स्वतःचा उमेदवार न देता पासवान आणि कुशवाहा यांना पाठिंबा दिल्यास एनडीएचे चार उमेदवार सहज विजयी होतील आणि काही मते शिल्लक राहतील. पाचव्या जागेसाठी तीन मतांची गरज भासेल; ती विरोधकांकडून फोडल्यास महागठबंधनसाठी परिस्थिती गंभीर ठरू शकते.
महागठबंधनात राजदकडे 25, काँग्रेसकडे 6, भाकपा (माले)कडे 2, माकपा व एका अपक्षाकडे प्रत्येकी एक आमदार आहे—एकूण 35 उर्वरित सहा मतांसाठी तेजस्वींची कसोटी लागणार आहे. एआयएमआयएमचा पाठिंबा मिळवण्यासाठी राजदचे आमदार आयपी गुप्ता यांना हैदराबादला पाठविल्याची चर्चा असली तरी त्याची अधिकृत पुष्टी झालेली नाही. पाचपैकी चार जागांवर एनडीएचा विजय निश्चित मानला जात असताना, पाचवी जागा महागठबंधनासाठी खरी ‘अग्निपरीक्षा’ ठरणार आहे.
सरकारनामाचे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read Latest Marathi Political News, Breaking Political News from Maharashtra, India, Pune & Mumbai at Sarkarnama. To Get Live Political Marathi News on Mobile, Download the Sarkarnama Mobile App for Android and IOS. सरकारनामा आता सर्व सोशल मीडिया प्लॅटफॉर्मवर. ताज्या राजकीय घडामोडींसाठी फेसबुक, ट्विटर, इन्स्टाग्राम, शेअर चॅट, टेलिग्रामवर आणि व्हॉट्सॲप आम्हाला फॉलो करा. तसेच, सरकारनामा यूट्यूब चॅनेलला आजच सबस्क्राइब करा.