Atique Ahmed Murder Case : अतिक अहमदच्या खून प्रकरणी संशयाची सूई त्याच्या साडूवर

लखनऊ : अतिक अहमद आणि त्याचा भाऊ अशरफ यांच्या खुनाची (murder) तपासाची सुई त्याचे जुने जवळचे मित्र आणि शत्रूंकडे वळली आहे, त्यापैकी इम्रान नावाची एक व्यक्ती आहे. इम्रान हा अतिकचा सख्खा साडू आहे. इम्रान हा आधी अतीकसोबत काम करत होता. पण, काही मतभेदानंतर तो अतिकपासून वेगळा झाला होता. अतिक आणि त्यांचा भाऊ अशरफ यांचा प्रयागराजमध्ये १५ एप्रिल रोजी रात्री तिघांनी गोळ्या झाडून खून केला होता. (Suspicion on a relative in Atique and Ashraf murder case)

उमेश पाल खून प्रकरणानंतर प्रयागराज पालिका प्रशासनाने अतिकचा मेहुणा इम्रानच्या बेकायदेशीर प्लॉटिंगवर बुलडोझर चालवला होता. बख्शीमोडा येथील इम्रानच्या बेकायदा भूखंडावरही कारवाई करण्यात आली होती. इम्रान अतिकच्या जवळचा होता; पण अतिकला तो आवडत नव्हता. इम्रान आणि मोहम्मद मुस्लिम यांची सतत भेटत होते, असे पोलिस तपासात पुढे आले आहे. अतिकच्या खुनापूर्वही दोघांची भेट झाली होती. बिल्डर असलेला मोहम्मद मुस्लिम हा अतिकचा सर्वात मोठा फायनान्सर होता.

मोहम्मद मुस्लिम याला एसटीएफने ताब्यात घेतले आहे.अतिकचा मुलगा असद याच्याशी तो बोलत असल्याचा एक ऑडिओ समोर आला आहे, त्यानंतर एसटीएफने ही कारवाई केली आहे. मोहम्मद मुस्लिमने अतिकची पत्नी शाइस्ता हिला ८० लाख दिले होते.

दरम्यान, बुधवारी प्रयागराजमधील शहागंज पोलिस ठाण्याचे एसएचओ अश्वनी कुमार सिंह यांच्यासह पाच पोलिसांना निलंबित करण्यात आले आहे. यामध्ये दोन पोलिस उपनिरीक्षक आणि दोन हवालदारांचा समावेश आहे. जबाबदारी पार पाडताना निष्काळजीपणा केल्याचे आढळून आल्याने ही कारवाई करण्यात आली आहे.

अतिक आणि त्याचा भाऊ अशरफ अहमद यांच्या खून प्रकरणाचा तपास करण्यासाठी पोलीस आयुक्त रमित शर्मा यांनी अतिरिक्त पोलिस आयुक्त (गुन्हे) सतीश चंद्र यांच्या नेतृत्वाखाली तीन सदस्यीय विशेष तपास पथक (एसआयटी) स्थापन केले आहे. अन्य दोन सदस्यांमध्ये एसीपी कोतवाली सतेंद्र प्रसाद तिवारी आणि निरीक्षक (इन्व्हेस्टिगेशन सेल, गुन्हे) ओम प्रकाश यांचा समावेश आहे.