काँग्रेसला धक्का; विधानपरिषद सदस्य चंद्रकांत रघुवंशींचा राजीनामा

मुंबई : विधानसभा निवडणुकीच्या तोंडावर काँग्रेसला अजून एक धक्का बसला असून विधानपरिषद सदस्य चंद्रकांत रघुवंशी यांनी आपल्या आमदारकीचा राजीनामा दिला आहे. रघुवंशी शिवसेनेत प्रवेश करणार आहेत.

विधानसभा निवडणुकीत काँग्रेसला एकामागोमाग एक धक्के बसत आहेत. नंदुरबार धुळे जिल्ह्यात काँग्रेसला मोठा धक्का बसला असून चंद्रकांत रघुवंशी यांनी विधानपरिषदेच्या आमदारकीचा राजीनामा दिला. विधानपरिषदेचे सभापती रामराजे नाईक निंबाळकर यांच्या हाती रघुवंशी यांनी आपला राजीनामा सोपवला. चंद्रकांत रघुवंशी यांच्यासोबत शिवसेना सचिव मिलिंद नार्वेकर, शिवसेना नेते सुभाष देसाई यावेळी उपस्थित होते. चंद्रकांत रघुवंशी काँग्रेसचे विधानपरिषदेचे तीन वेळा आमदार होते. रघुवंशी यांची मुदत एप्रिलमध्ये संपत आहे. त्यांनी १९९२ ते १९९८ असे सहा वर्ष धुळ्यात जिल्हा परिषद अध्यक्षपद भूषवलं होतं.