Ahmedabad Plane Crash : कोसळलेल्या विमानात होता 'हादरवणारा' पेट्रोल साठा : स्फोटात तयार झालं लोखंडही वितळवणारं तापमान

Ahmedabad plane crash : अहमदाबाद येथील विमान क्रॅश दुर्घटनेने अखंड देश सुन्न झाला आहे. गुरुवारी दुपारी अहमदाबाद विमानतळावरुन लंडनच्या दिशेने झेपावलेले एअर इंडियाचे (एआय 171) विमान उड्डाणानंतर काही मिनिटांमध्ये क्रॅश झाले. या विमानात तब्बल 230 प्रवासी आणि 12 क्रु मेंबर असे 242 होते. यापैकी 241 जणांचा मृत्यू झाला. तसेच हे विमान बी. जे. मेडिकल कॉलेजच्या हॉस्टेलवर क्रॅश झाले. तिथले वरिष्ठ डॉक्टर आणि इंटर्नसह 24 जणांचा मृत्यू झाला आहे.

या अपघातात केवळ एकच प्रवासी वाचला आहे. त्याच्यावर रुग्णालयात उपचार सुरु आहेत. जो एक प्रवासी वाचला तो रमेश विश्वकुमार हा केवळ नशीबवान ठरला आहे. इमर्जन्सी एक्झिटजवळ बसला असल्याने तो सीटसह बाहेर फेकला गेला. अन्य 241 जण आणि 24 डॉक्टर हे सर्व अक्षरशः होरपळून मृत पावले. या विमानात इंधनच एवढे होते की कोणाला बचावाची संधीच मिळाली नाही. हवाई वाहतूकतज्ज्ञांच्या मते अपघाताचे हेही एक प्रमुख कारण असू शकते.

अहमदाबाद ते लंडन प्रवासासाठी सुमारे 9 तासांचा अवधी लागतो. मात्र, आपत्कालीन परिस्थितीचा विचार करुन विमान 12 तास उडू शकेल एवढे इंधन होते. त्यामुळे विमानात पूर्ण क्षमतेने म्हणजे सुमारे एक लाख 26 हजार 907 लिटर अत्यंत शक्तीशाली इंधन होते. पण पूर्ण क्षमतेने भरलेले हे इंधनच या अपघाताचे कारण ठरल्याचे सांगितले जाते. जास्त इंधनामुळे विमानाचे वजन वाढले असावे. तसेच इंधन जास्त असल्याने प्रचंड मोठा स्फोट झाला आणि मृतांची संख्या वाढली.

स्फोटानंतर सुमारे 2 ते अडीच हजार डिग्री सेल्सिअस तापमानाची निर्मिती झाली. या तापमानावर लोखंडही पूर्णत: वितळते. केंद्रीय गृहमंत्री अमित शहा यांनीही इंधन जास्त असल्याने तापमान वाढल्याचे सांगितले. ते म्हणाले विमानात जवळपास सव्वा लाख लिटर इंधन होते. त्यामुळे तापमान इतके वाढले की कोणालाही वाचवण्याची संधीच मिळाली नाही.