भाजपचे चाणक्य म्हणून ओळखले जाणारे केंद्रीय गृहमंत्री अमित शाह यांच्या राजकीय दूरदृष्टी आणि अचूक रणनीतीमुळे भाजपचा विस्तार देशभरात सातत्याने वाढत आहे. बिहार विधानसभा निवडणुकीत राष्ट्रीय लोकशाही आघाडीला (NDA) मिळालेल्या दणदणीत विजयानंतर आता भाजपचे संपूर्ण लक्ष पश्चिम बंगालमध्ये परिवर्तन घडवण्यावर केंद्रित झाले आहे. बंगालमध्ये परिवर्तन घडवण्यासाठी भाजपा पूर्ण ताकदीने तयारी करत असून, नुकत्याच जे. पी. नड्डा यांच्या निवासस्थानी झालेल्या बैठकीत अमित शाह यांनी या बैठकीत ‘मिशन बंगाल’ यशस्वी करण्यासाठी मूलमंत्र सांगितला.
शाह यांनी सांगितले की बिहारमधील विजय हा केवळ एका राज्याचा नव्हे, तर तो संपूर्ण भारताचा विजय आहे. हा विजय 'घुसखोरीविरोधी' जनभावनेला मिळालेला मोठा पाठिंबा आहे. बिहारमध्ये एनडीएतील पाच घटक पक्षांनी पांडवांसारखी एकजूट दाखवली आणि जनतेने पंतप्रधान नरेंद्र मोदी आणि मुख्यमंत्री नीतीश कुमार यांच्या नेतृत्वावर मोठा विश्वास दाखवला.
या बैठकीत अमित शाह यांनी “जहां कम वहां हम” हा महत्वाचा मंत्र दिला. शाह म्हणाले या यशामध्ये प्रत्येकाचा एक टक्का मेहनतीचाही मोठा वाटा आहे. मात्र, या विजयानंतर कोणालाही अहंकार येऊ नये, असे कठोर निर्देश त्यांनी दिले. पक्षाची जबाबदारी केवळ निवडणूक लढवण्यापुरती मर्यादित नसून, ज्या ठिकाणी पक्ष कमकुवत आहे, तिथे पक्षाची ताकद वाढवणे हे प्रत्येक कार्यकर्त्याचे कर्तव्य आहे. आता आपल्यासमोर पश्चिम बंगालची मोठी लढाई आहे आणि या लढाईसाठी पक्षातील प्रत्येकाने 'कार्यकर्ता मोड'वर येत काम करावे.
सध्या पश्चिम बंगालमध्ये मुख्यमंत्री ममता बनर्जी यांच्या नेतृत्वाखालील तृणमूल काँग्रेसची (TMC) सत्ता असून, 2011 पासून हा पक्ष सलग सत्तेत आहे. मागील काही वर्षांत भाजपने बंगालमध्ये आपली ताकद वाढवली असली तरी, अद्याप अपेक्षित कामगिरी साधता आलेली नाही. परंतु, 2019 च्या लोकसभा निवडणुकीत भाजपने बंगालमध्ये 12 जागा जिंकल्या होत्या, ज्यामुळे पक्षाला नवा आत्मविश्वास मिळाला आहे.
बंगालमधील पक्ष संघटना अधिक मजबूत करण्यासाठी भाजपने आता कंबर कसली आहे. पश्चिम बंगालमध्ये संघटन मजबूत करण्यासाठी भाजपमधील वेगवेगळ्या राज्यांतील सहा वरिष्ठ नेत्यांची नियुक्ती केली आहे. 2016 मध्ये केवळ तीन जागा मिळालेल्या भाजपने 2021 मध्ये 77 जागा मिळवत मोठी झेप घेतली होती. त्यामुळे या वेळी विशेष रणनीती आखून पक्षाने कामाला सुरुवात केली आहे.
राज्यातील प्रवासी बंगाली नागरिकांशी संपर्क वाढवून त्यांचा पाठिंबा मिळवण्यावरही पक्षाने भर दिला आहे. आगामी निवडणुका लक्षात घेता भाजपला बंगालची सत्ता मिळवण्यासाठी कोणतीही कसर सोडायची नाहीये, त्यामुळे पूर्ण ताकदीने बंगाल जिंकण्याच्या तयारीला लागली आहे.
सरकारनामाचे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read Latest Marathi Political News, Breaking Political News from Maharashtra, India, Pune & Mumbai at Sarkarnama. To Get Live Political Marathi News on Mobile, Download the Sarkarnama Mobile App for Android and IOS. सरकारनामा आता सर्व सोशल मीडिया प्लॅटफॉर्मवर. ताज्या राजकीय घडामोडींसाठी फेसबुक, ट्विटर, इन्स्टाग्राम, शेअर चॅट, टेलिग्रामवर आणि व्हॉट्सॲप आम्हाला फॉलो करा. तसेच, सरकारनामा यूट्यूब चॅनेलला आजच सबस्क्राइब करा.