BJP on Brijbhushan Singh: कुस्तीपटूंच्या आंदोलन प्रकरणी भाजप हायकमांड अॅक्शन मोडवर; ब्रिजभूषण सिंहांना दिले महत्त्वाचे निर्देश

Wrestlers Protest News: राजधानी दिल्लीत सुरु असलेल्या कुस्तीपटुंच्या आंदोलन दिवसेंदिवसं अधिक तीव्र होत चालले आहे. अशात एक महत्त्वाची माहिती समोर आली आहे. इतके दिवस याप्रकरणी शांत असलेली भाजप आता भारतीय कुस्ती महासंघाचे अध्यक्ष ब्रिजभूषण शरण सिंह (Brijbhushan Singh) यांच्या विरोधात अॅक्शन मोडवर आली आहे.

मिळालेल्या माहितीनुसार, भाजप (BJP) हायकमांडने ब्रिजभूषण विरोधात कारवाईचा बडगा उगारला आहे. केंद्रीय नेतृत्वाने ब्रिजभूषण यांना कुस्तीपटूंच्या बाबतीत अनावश्यक वक्तव्ये टाळण्याची सूचना केली आहे. यासोबतच, हायकमांडच्या आदेशाने ब्रिजभूषण यांनी 5 जून रोजी होणारी प्रस्तावित सभा रद्द केली आहे.

ब्रिजभूषण शरण सिंह यांनी ५ जून रोजी अयोध्येत जनजागृती रॅली काढणार होते. या रॅलीमध्ये 11 लाख लोक त्यांच्या समर्थनार्थ रस्त्यावर उतरणार दावा त्यांनी केला होता. पण आज (२ जून) फेसबुक पोस्टद्वारे त्यांनी ही रॅली रद्द करत असल्याची घोषणा केली. (Wrestlers Protest)

विरोधी पक्षांवर आरोप

ब्रिजभूषण यांनी फेसबुक पोस्टमध्ये लिहिले, ''माझ्या प्रिय शुभचिंतकांनो! तुमच्या पाठिंब्याने मी गेली २८ वर्षे लोकसभेचा सदस्य म्हणून काम केले आहे. मी सत्तेत असताना आणि विरोधात असताना सर्व जाती, समाज आणि धर्माच्या लोकांना एकत्र करण्याचा प्रयत्न केला. याच कारणांमुळे माझे राजकीय विरोधक आणि त्यांच्या पक्षांनी माझ्यावर खोटे आरोप केले आहेत. (

सध्याच्या परिस्थितीत काही राजकीय पक्ष ठिकठिकाणी मोर्चे काढून प्रांतवाद, प्रादेशिकवाद आणि जातीय संघर्ष वाढवून सामाजिक सलोखा बिघडवण्याचा प्रयत्न करत आहेत. यासाठी संपूर्ण समाजात पसरलेल्या तिरस्काराच्या भावनांवर विचारमंथन करण्यासाठी ५ जून रोजी अयोध्येत संत संमेलन घेण्याचे ठरले होते. पण पोलीस माझ्यावरील आरोपांची चौकशी करत असून सर्वोच्च न्यायालयाच्या निर्देशांचा आदर करत ५ जूनला होणारी ‘जन चेतना’ महारॅली आणि 'अयोध्या चलो' कार्यक्रम काही दिवसांसाठी पुढे ढकलण्यात येत असल्याचे ब्रिजभूषण यांनी आपल्या पोस्टमध्ये लिहीलं आहे.

Edited By-Anuradha Dhawade