Priyanka Gandhi : भाजप खासदारांनी प्रियांका गांधींना दिले खास ‘गिफ्ट’; करून दिली ‘त्या’ घटनेची आठवण...

New Delhi : मागील काही दिवसांत काँग्रेसच्या खासदार प्रियांका गांधी यांनी आगळ्यावेगळ्या बॅगा संसदेत आणत प्रतिकात्मक आंदोलन केले होते. मग तो गौतम अदानींचा मुद्दा असो की बांग्लादेशातील हिंदूंवरील हल्ले... प्रियांका यांनी अशा बॅगांच्या माध्यमातून संबंधित घटनांकडे सरकारचे लक्ष वेधण्याचा प्रयत्न केला होता. भाजपने शुक्रवारी अशीच एक बॅग त्यांना भेट पलटवार केला आहे.

भाजपच्या खासदार अपराजिता सारंगी यांनी शुक्रवारी प्रियांका गांधी यांना ही बॅग भेट दिली. या बॅगेवर 1984 असे लिहिले होते. त्यामुळे सारंगी यांनी गांधीगिरी करत प्रियांका गांधींना एकप्रकारे 1984 मध्ये झालेल्या दंगलीची आठवण करुन दिली आहे. त्यामुळे या गांधीगिरीची संसदेत चर्चा रंगली होती.

याबाबत बोलताना अपराजिता सारंगी म्हणाल्या, खासदार प्रियांका गांधी यांना फॅशनेबल बॅगची आवड असल्याने त्यांना ही बॅग गिफ्ट दिली. सुरूवातीला त्यांनी बॅग घेण्यास नकार दिला. पण नंतर त्यांनी बॅग घेतल्याचेही सारंगी यांनी स्पष्ट केले. याचा एक व्हिडीओही सोशल मीडियात व्हायरल झाला आहे.

प्रियांका गांधी यांना भेट दिलेल्या बॅगेवर 1984 हे साल लाल रंगात लिहिले असून रक्ताचे ओघळ येत असल्याचे दाखवण्यात आले आहे. त्यावेळी झालेल्या शीखविरोधी दंगलीवर बोट ठेवण्यात आले आहे. त्यावर सध्याच्या पिढीला काँग्रेसने मागील 50 वर्षांत काय केले हे कळायला हवे, असे सारंगी म्हणाल्या आहेत. 

मागील काही दिवसांत प्रियांका गांधींनी तीनवेळा वेगवेगळ्या प्रकारच्या बॅग संसदेत आणल्या होत्या. यापार्श्वभूमीवर सारंगी यांनी ही कृती केली. एका बॅगवर पॅलेस्टाईन असे लिहिले होते. या माध्यमातून त्यांनी आपले पॅलेस्टाईनला समर्थन असल्याचे त्यांनी दाखवून दिले होते. दुसऱ्या बॅगेवर आपण बांग्लादेशातील हिंदूसोबत असल्याचे म्हटले होते. त्याआधी त्यांनी मोदी-अदानी भाई भाई असे लिहिलेली बॅग संसदेत आणली होती.