Congress : काँग्रेसला डबल झटका; देवरांआधी मोठ्या नेत्यानं दिला पदाचा राजीनामा

Political News : काँग्रेसला दोन दिवसांत दोन मोठे झटके बसले आहेत. राहुल गांधी यांच्या भारत जोडो न्याय यात्रेला आजपासून सुरूवात असतानाच दोन नेत्यांनी राजीनामे दिले आहेत. आगामी लोकसभा निवडणुकीच्या पार्श्वभूमीवर पक्षातील नेत्यांमधील नाराजी आता उफाळून येऊ लागली आहे. त्यावरून भाजप नेत्यांनी आधी पक्षातील नेत्यांना न्याय द्या, असा टोला काँग्रेसला लगावला आहे.

माजी खासदार मिलिंद देवरा (Milind Deora) यांनी रविवारी सकाळी काँग्रेसला (Congress) सोडचिठ्ठी दिल्याचा निर्णय जाहीर केला. ते शिवसेना (Shiv Sena) शिंदे गटात प्रवेश करणार आहेत. मुंबई काँग्रेसला हा मोठा धक्का मानला जात आहे. ते दक्षिण मुंबई मतदारसंघातून दोनदा लोकसभेत गेले होते. तर केंद्रात मंत्रीही होते. त्यांच्यासोबत काही माजी नगरसेवकही काँग्रेसला रामराम ठोकणार आहेत.

दुसरीकडे आसाममध्येही पक्षातील नाराजी सातत्याने समोर येत आहे. आसाम प्रदेश काँग्रेसचे सरचिटणीस व ज्येष्ठ प्रवक्ते अपूर्व भट्टाचार्य (Apurba Kumar Bhattacharjee) यांनी शनिवारी पदाचा राजीनामा दिला आहे. आसाम काँग्रेस कमिटीची घोषणा झाल्यापासूनच ते नाराज होते. त्यांनी सात तारखेलाच याबाबत सूचक ट्विट करून पक्ष सोडण्याबाबतचे सुतोवाच केले होते.

(राजकारणातील महत्त्वाच्या बातम्यांचे अपडेट्ससाठी सरकारनामाचे अधिकृत WhatsApp चॅनल फॉलो करा!)

भट्टाचार्य यांनी शनिवारी पदाचा राजीनामा दिल्याचे स्पष्ट केले. ते म्हणाले, 2013 पासून आजपर्यंत मी पक्षाविरोधात एकही विधान केले नाही. पण मला पक्षातून बाहेर काढण्याचे षडयंत्र रचले जात आहे. त्यामुळे मला त्रास होत आहे. क्षमता असूनही मला २०१४ पासून आतापर्यंत झालेल्या सर्व निवडणुकांमध्ये मला तिकीट देण्यात आलं नाही. या सर्व गोष्टी विचारात घेऊन मी राजीनामा दिला असल्याचे भट्टाचार्य यांनी स्पष्ट केले.

दरम्यान, दोन दिवसांत दोन नेत्यांनी राजीनामा दिल्याने काँग्रेसमधील अंतर्गत कलह पुन्हा समोर आला आहे. भाजपने राहुल गांधींच्या न्याय यात्रा आणि पक्षातील नेत्यांच्या राजीनाम्यावरून टीका केली आहे. काँग्रेसमधून नेते का बाहेर पडत आहेत, असा सवाल करत भाजपने राहुल गांधींनी आधी नेत्यांना न्याय देवा, असा खोचक सल्ला दिला आहे.