Yashwant Verma News : घरात नोटांचा ढीग सापडलेल्या न्यायाधीशांवरील कारवाईला केंद्राची मंजुरी; सुप्रीम कोर्टाने याचिका फेटाळली

New Delhi News : दिल्ली हायकोर्टातील न्यायाधीश यशवंत वर्मा यांच्याविषयी मोठी बातमी समोर आली आहे. त्यांच्या घरात काही दिवसांपूर्वी नोटांचे ढीग आढळून आले होते. तसेच घराच्या परिसरात जळालेल्या नोटाही सापडल्या होत्या. त्यानंतर सुप्रीम कोर्टाच्या कॉलेजियमने तातडीने वर्मा यांच्याबाबत तडकाफडकी निर्णय घेत त्यांच्या बदलीचा निर्णय घेतला होता. या बदलीला केंद्र सरकारने मंजुरी दिली आहे.

कॉलेजियमच्या शिफारशीला सुप्रीम कोर्टाने मंजुरी दिल्याने न्यायाधीश वर्मा यांच्या अलाहाबाद हायकोर्टातील बदलीवर आता शिक्कामोर्तब झाले आहे. दिल्ली हायकोर्टाआधी ते अलाहाबादमध्ये कार्यरत होते. त्यांना पुन्हा त्याचजागी पाठवण्यात आले आहे. मात्र, त्यांच्या बदलीला अलाहाबाद हायकोर्टातील वकिलांनी विरोध केला होता. त्याविरोधात त्यांच्याकडून आंदोलनही करण्यात आले होते. 

केंद्र सरकारने वर्मा यांच्या बदलीला मंजुरी दिल्याने आता ते कार्यभार स्वीकारतील. त्याचप्रमाणे वर्मा यांच्या सोबत दिल्ली हायकोर्टातील आणकी एक न्यायाधीश चंद्रधारी सिंह यांचीही बदली अलाहाबाद हायकोर्टात कऱण्यात आली आहे. वर्मा यांच्या घरामध्ये मागील आठवड्यात मोठ्या प्रमाणात रोकड आढळून आल्याचे समोर आले होते.

वर्मा यांच्या घरामध्ये 14 मार्चला आग लागली होती. आग विझविण्यासाठी आलेल्या अग्निशमन दलाच्या जवानांना स्टोअर रुममध्ये नोटांचे ढीग आढळून आले होते. त्यातील बऱ्याच नोटा जळाल्या होत्या. सुप्रीम कोर्टाकडून याबाबतचा व्हिडीओ प्रसिध्द करण्यात आला होता. त्यानंतर सरन्यायाधीश संजीव खन्ना यांनी 22 मार्चला याप्रकरणाची चौकशी करण्यासाठी तीन सदस्यांच्या समितीमार्फत अंतर्गत तपास सुरू केला.

दरम्यान, वर्मा यांच्याविरोधात गुन्हा दाखल करण्याचे आदेश दिल्ली पोलिसांना द्यावेत, या मागणीची याचिका आज सुप्रीम कोर्टाकडून फेटाळण्यात आली. न्यायाधीश अभय ओक यांच्या अध्यक्षतेखालील खंडपीठाने ही याचिका फेटाळली. या प्रकरणाची अंतर्गत चौकशी सरन्यायाधीशांनी सुरू केली आहे. समितीचा रिपोर्ट आल्यानंतर पुढील प्रक्रियेनुसार कार्यवाही होईल. पुढे खूप पर्याय आहेत. त्यामुळे सध्या त्यात दखल देण्याची गरज नाही, असे कोर्टाकडून स्पष्ट करण्यात आले.