BJP couple marriage : भाजपच्या कार्यकर्त्या रिंकू यांच्याकडून 61 वर्षाच्या नेत्याला प्रपोज; दोघे अडकणार विवाह बंधनात

BJP Politics : भाजपच्या एका 61 वर्षांच्या ज्येष्ठ नेत्याला एका महिला कार्यकर्त्याने प्रपोज केले अन् आता या दोघांचे लग्न होत आहे... होय, हे खरं आहे. पश्चिम बंगाल भाजपचे माजी प्रदेशाध्यक्ष व ज्येष्ठ ज्येष्ठ नेते आणि महिला कार्यकर्त्या रिंकू मुजूमदार विवाह बंधनात अडकणार आहेत. घोष हे अविवाहित आहेत. तर रिंगू यांना एक 17 वर्षांचा मुलगा आहे.

दिलीप घोष यांच्या घरीच हे लग्न अत्यंत साधेपणाने होणार आहे. त्यानंतर विवाहाची नोंदणी केली जाईल. दोघेही बंगालमधील न्यू टाऊन भागात पक्षाचे काम करतात. दिलीप घोष हे बंगालमधील भाजपचे मोठे नाव आहे. ते आमदार-खासदार आणि भाजपचे प्रदेशाध्यक्षही होते. तर रिंकू या महिला मोर्चामध्ये सक्रीय होत्या. घोष आमदार असल्यापासून रिंकू आणि त्यांची ओळख होती.

मीडियाशी बोलताना रिंकू यांनी या विवाहामागची कहाणी सांगितले. त्या म्हणाल्या, घोष हे आमदार-खासदार असताना मी ब्लॉक स्तरावर पक्षाचे काम करायचे. आम्ही 2021 मध्ये पहिल्यांच बोललो. पण तेही पक्षाशी संबंधित बोलणे होते. लोकसभा निवडणुकीवेळीही बोलणे वाढले. सप्टेंबर महिन्यात मी आयुष्यात स्थिरस्थावर होण्याबाबत विचार करू लागले. माझे राजकीय करिअर स्वीकारणारे कोणाशी तरी विवाह करण्याचा निर्णय घेतला आणि दिलीप घोष यांचा विचार आला.

माझ्या मतदारसंघात तेच एक चांगले अविवाहित व्यक्तिमत्व होते. इतर राजकीय नेत्यांप्रमाणे ते नाहीत. त्यामुळे मग त्यांना विवाहासाठी विचारणा केली. मात्र, त्यावेळी त्यांनी लगेचच नकार दिला. पण पुढे तीन महिने त्यांनी विचार केला. आईचे मत जाणून घेतले. त्यानंतर त्यांनी तयारी दर्शविल्याचे रिंकू यांनी सांगितले.

दिलीप घोष यांना या विवाहबाबत विचारणा केली असता त्यांनी अत्यंत विनोदी शैलीत याचे उत्तर दिले. मी लग्न करू शकत नाही का? लग्न करणे हा गुन्हा आहे का, असे उलट प्रश्न त्यांनी माध्यम प्रतिनिधींना करत विवाहाबाबत सूचक संकेत दिले. शुक्रवारी या दोघांचा हिंदू पध्दतीने विवाह होणार आहे.