Republic Day : प्रजासत्ताक दिनासाठी परदेशी पाहुणे ठरले, पण पाकिस्तानमुळे पेच; काय आहे कनेक्शन?

New Delhi News : प्रजासत्ताक दिनी दिल्लीत होणाऱ्या सोहळ्यासाठी दरवर्षी विविध देशांच्या प्रमुखांना प्रमुख पाहुणे म्हणून आमंत्रित केले जाते. यावर्षीच्या पाहुण्यांची यादीही निश्चित झाली आहे. बहुतेकांना आमंत्रणं गेली आहे. इंडोनेशियाचे राष्ट्रपती प्रबोवो सुबियंतो हे यंदा प्रमुख पाहुणे असतील. मात्र, याबाबत अजूनही अधिकृत घोषणा करण्यात आलेली नाही. त्यामागे पाकिस्तान कनेक्शन असल्याचे वृत्त आहे.

राष्ट्रपती सुबियंतो यांच्यामुळे पेच निर्माण झाला आहे. केंद्र सरकारकडून त्यावर तोडगा काढण्याचा प्रयत्न केला जात आहे. त्यानंतरच अधिकृत घोषणा केली जाईल. हा पेच पाकिस्तानमुळे निर्माण झाला आहे. सुबियंतो हे भारतात प्रजासत्ताक दिनाच्या सोहळ्याला उपस्थित राहणार असले तरी तिथून ते थेट पाकिस्तान दौऱ्यावर जाणार आहेत. केंद्र सरकारला हेच नको आहे.

भारताच्या दौऱ्यासोबत पाकिस्तानचा दौरा असून नये, यासाठी भारत प्रयत्नशील आहे, असे वृत्त ‘न्यूज 18’ने दिले आहे. इंडोनेशियाचे राष्ट्रपती 26 जानेवारीला तीन दिवसांच्या पाकिस्तान दौऱ्यावर येत असल्याचे वृत्त पाकिस्तानातील मीडियाने दिले आहे. भारताचे पाकिस्तानशी सध्याचे संबंध खूप ताणले गेलेले आहेत. अशा स्थितीत कोणत्याही प्रकारचे कनेक्शन केंद्र सरकारला नको आहे.

भारताकडून सुबियंतो यांच्या दौऱ्यात बदल करण्याबाबत प्रयत्न केले जात आहेत. ते भारतातून थेट पाकिस्तानला गेले तर चुकीचा संदेश जाऊ शकतो. भारत आणि इंडोनेशियामध्ये सर्वच पातळीवर चांगले राजकीय संबंध आहेत. औद्योगिक देवाण-घेवाणही मोठ्या प्रमाणात होत असते. तर दुसरीकडे इंडोनेशिया आणि पाकिस्तानचे राजकीय आणि आर्थिक संबंधही वाढू लागले आहेत.

सहा वर्षांपूर्वीही असाच प्रकार घडला होता. इंडोनेशियाचे माजी राष्ट्रपती विडोडो यांना 2018 मध्ये प्रजासत्ताक दिनासाठी प्रमुख पाहुणे म्हणून आमंत्रित करण्यात आले आहेत. त्यानंतर भारतातून ते थेट पाकिस्तानला गेले होते. आता पुन्हा त्याचीच पुनरावृत्ती होऊ नये, यासाठी भारताचे प्रयत्न सुरू आहेत.