IPS officer news : IPS अधिकाऱ्याचे पत्नीसोबत भांडण? अल्पवयीन मुलीने उचलले टोकाचे पाऊल; 16 वर्षांपूर्वी घेतले होते दत्तक

मध्य प्रदेशातील भोपाल येथील चार इमली परिसरातून एक धक्कादायक घटना समोर आली आहे. राज्य पोलीस विभागातील वरिष्ठ IPS अधिकारी संजीव कंचन यांच्या 17 वर्षीय मुलीने राहत्या घरी गळफास घेत आत्महत्या केल्याची माहिती समोर आली आहे. या घटनेमुळे पोलीस विभागात मोठी खळबळ उडाली असून संपूर्ण प्रकरणाची सखोल चौकशी सुरू करण्यात आली आहे.

मंगळवारी दुपारच्या सुमारास अधिकारी संजीव कंचन हे जेवणासाठी घरी परतले होते. त्यावेळी घरातील खोलीत मुलगी गळफास घेतलेल्या अवस्थेत आढळली. कुटुंबीयांनी तातडीने तिला जवळच्या रुग्णालयात दाखल केले. मात्र डॉक्टरांनी तपासणीनंतर तिला मृत घोषित केले. संबंधित मुलगी 11वीत शिक्षण घेत होती.

घटनेची माहिती मिळताच हबीबगंज पोलीस ठाण्याचे अधिकारी घटनास्थळी दाखल झाले. पोलिसांनी घराची तपासणी केली असता कोणतीही सुसाइड नोट सापडली नसल्याचे समोर आले आहे. त्यामुळे तिने इतके टोकाचे पाऊल नेमके कोणत्या कारणामुळे उचलले, याबाबत अद्याप स्पष्ट माहिती मिळालेली नाही. पोलिसांनी आकस्मिक मृत्यूची नोंद करून मृतदेह शवविच्छेदनासाठी पाठवला आहे.

तपासादरम्यान पोलिसांनी मुलीचा मोबाईल फोन, कॉल रेकॉर्ड आणि सोशल मीडिया अ‍ॅक्टिव्हिटीची तपासणी सुरू केली आहे. तिच्यावर कोणता मानसिक ताण होता का, याचाही शोध घेतला जात आहे. याचदरम्यान आणखी एक महत्त्वाची बाब समोर आली असून संबंधित मुलगी ही दत्तक घेतलेली असल्याची माहिती मिळाली आहे. सुमारे 16 वर्षांपूर्वी अधिकृत प्रक्रियेद्वारे तिला दत्तक घेण्यात आले होते.

दरम्यान, घरात पती-पत्नीमध्ये वारंवार वाद होत असल्याची माहितीही तपासात पुढे आली आहे. या कौटुंबिक तणावाचा अल्पवयीन मुलीच्या मानसिक स्थितीवर परिणाम झाला होता का, याचा तपास पोलीस करत आहेत. या घटनेमुळे परिसरात हळहळ व्यक्त केली जात असून अनेक प्रश्न अनुत्तरित राहिले आहेत.