Assembly Election : महायुतीची ‘लाडकी बहीण’ काँग्रेससाठी झाली ‘प्यारी दीदी’; दिल्लीत मोठी घोषणा...

New Delhi : महायुती सरकारने विधानसभा निवडणुकीआधी लाडकी बहीण योजना सुरू केली अन् निवडणुकीत मतांचा वर्षाव झाला. त्यानंतर आता काँग्रेसलाही या योजनेची भुरळ पडली आहे. पक्षाने दिल्लीतील विधानसभा निवडणुकीसाठी ही योजना जाहीर केली आहे. लाडकी बहीण ऐवजी प्यारी दीदी असे काँग्रेसने म्हटले आहे.

दिल्लीत काँग्रेसची सत्ता आल्यास प्यारी दीदी योजना सुरू करण्याचे आश्वासन काँग्रेसने दिले आहे. या योजनेअंतर्गत महिलांना प्रति महिना अडीच हजार रुपये दिले जाणार आहेत. कर्नाटकचे उपमुख्यमंत्री डी. के. शिवकुमार यांनी दिल्लीत या योजनेची घोषणा केली. राज्यात काँग्रेसची सत्ता येणार असल्याचा विश्वासही त्यांनी यावेळी व्यक्त केला. ही योजना कर्नाटकातील योजनेचे मॉडेल असल्याचे तेही म्हणाले.

आप सरकारचीही योजना

आम आदमी पक्षाचे दिल्लीत सरकार आहे. या सरकारने यापूर्वीच महिलांसाठी दरमहा 2100 रुपये देण्याची योजना जाहीर केली आहे. त्याला महिला सन्मान योजना असे नाव देण्यात आले आहे. त्यासाठी अर्ज भरण्यासही सुरूवात करण्यात आली आहे. मात्र, निवडणुकीनंतरच दिल्लीतील महिलांना आपच्या या योजनेचा फायदा मिळू शकतो.

आपच्या योजनेवरून वाद

आपने जाहीर केलेल्या योजनेवरून वाद निर्माण झाला आहे. माजी मुख्यमंत्री अरविंद केजरीवाल व विद्यमान मुख्यमंत्री आतिशी यांनी जाहीर केलेल्या या योजनेला सरकारची अधिकृत मान्यता नसल्याचे संबंधित विभागाने स्पष्ट केले आहे. त्यावरून सध्या राजकारण तापले आहे. मात्र, तसे असले तरी सत्ता कुणाचीही येऊद्यात महिलांना दरमहा दोन हजारांहून अधिक रुपये मिळणार, हे निश्चित.

भाजपही योजना आणणार

महाराष्ट्राप्रमाणेच दिल्लीतही महिलांसाठी लाडकी बहीण योजनेप्रमाणे योजना सुरू करण्याचे आश्वासन भापकडूनही दिले जाऊ शकते. हरियाणा, काश्मीर, झारखंडमध्येही भाजपने अशाच घोषणा केल्या होत्या. अद्याप भाजपकडून जाहीरनामा प्रसिध्द केलेला नाही. जाहीरनाम्यामध्ये अशा योजनेचा समावेश केला जाण्याची शक्यता आहे.