Milkipur Bypoll Result : मोठी बातमी : भाजपने लोकसभेतील पराभवाचा वचपा काढला; अयोध्येत कमळ फुलणार...

Uttar Pradesh Election Update : लोकसभा निवडणुकीत उत्तर प्रदेशात भाजपचा दारूण पराभव झाला. त्यातही अयोध्येतील पराभव भाजपच्या चांगलाच जिव्हारी लागला होता. त्यामुळे अयोध्येतील मिल्कीपूर विधानसभा मतदारसंघातील पोटनिवडणूक भाजपने प्रतिष्ठेची केली होती. आजच्या निकालामध्ये भाजप या मतदारसंघात मोठ्या मताधिक्याने विजयाच्या दिशेने वाटचाल करत आहे.

लोकसभा निवडणुकीतील पराभवाचा वचपा भाजप काढणार, असेच सध्याचे चित्र आहे. सकाळी साडे दहा वाजेपर्यंतच्या मतमोजणीनुसार, पाच फेऱ्यांचे कल हाती आले असून भाजपचे उमेदवार चंद्रभानू पासवान यांनी तब्बल 14 हजारांहून अधिक मतांची आघाडी घेतली आहे. त्यांना 27 हजार 115 मते पाचव्या फेरीअखेर मिळाली आहेत.

समाजवादी पक्षाचे उमेदवार अजित प्रसाद पिछाडीवर पडले आहे. त्यांना आतापर्यंत केवळ 12 हजार 850 मते मिळाली आहेत. विशेष म्हणजे ते फैजाबादचे खासदार अवधेश प्रसाद यांचे पुत्र आहेत. मिल्कीपूर मतदारसंघ त्यांच्याच मतदारसंघातील आहे. त्यामुळे अजित प्रसाद यांची पिछाडी अवधेश प्रसाद यांच्यासह समाजवादी पक्षाचे अध्यक्ष अखिलेश यादव यांच्यासाठीही धक्कादायक मानली जात आहे.

लोकसभा निवडणुकीआधी मिल्कीपूरचे प्रतिनिधित्व अवधेश प्रसाद करत होते. त्यांनी लोकसभेसाठी राजीनामा दिल्याने या मतदारसंघात पोटनिवडणूक झाली. त्यांनी आपल्याच मुलाला उमेदवारी देत विजयासाठी कंबर कसली होती. अखिलेश यादव यांनी जोरदार प्रचारही केला. मुख्यमंत्री योगी आदित्यनाथ यांनीही प्रचारात कोणतीही कसर ठेवली नाही. अनेक बड्या नेत्यांना त्यांनी कामाला लावले होते.

समाजवादी पक्षाने जंग जंग पछाडूनही त्यांना या निवडणुकीत विजय मिळताना दिसत नाही. तर भाजपने केलेल्या प्लॅनिंग यशस्वी होताना दिसत आहे. पासवान हे मोठ्या मताधिक्याने विजय मिळवत समाजवादी पक्षाला धूळ चारण्याची शक्यता आहे. लोकसभा निवडणुकीत भाजपवर पराभवाची नामुष्की ओढवली होती. त्यामुळे या निवडणुकीतील विजय भाजपच्या जखमेवर फुंकर मारून काहीसा दिलासा देईल, असे दिसते.