Nari Shakti Adhiniyam: विरोधकांचा मोठा विजय! 'नारी शक्ती वंदन अधिनियम' विधेयक नामंजूर; विधेयकाच्या बाजूनं अन् विरोधात किती मतं पडली? जाणून घ्या

Nari Shakti Vandan Adhiniyam: संसदेच्या विशेष अधिवेशनात दोन दिवस जोरदार चर्चेनंतर अखेर नारी शक्ती वंदन अधिनियमावर मतदान पार पडलं. यासाठी ४८९ जणांनी इलेक्ट्रॉनिक यंत्रणेद्वारे मतदान केलं. तर २० खासदारांनी चिठ्ठीद्वारे मतदान केलं. यामध्ये विधेयकाच्या मंजुरीसाठी आवश्यक असलेली मत न पडल्यानं हे विधेयक नामंजूर झालं आहे.

सभागृहात उपस्थित एकूण ५२८ खासदारांपैकी ४८७ खासदारांनी इलेक्ट्रॉनिक यंत्रणेद्वारे केलेल्या मतदानात या विधेयकाच्या बाजूनं २७८ मतं पडली तर विरोधात २११ मतं पडली. तसंच उर्वरित ४१ खासदारांनी चिठ्ठीद्वारे केलेल्या मतदानात विधेयकाच्या बाजूनं २० मतं पडली तर विरोधात २१ मतं पडली. त्यानुसार, एकूण ५२८ मतांपैकी विधेयकाच्या बाजूनं २९८ मतं पडली तर विरोधात २३० मतं पडली. हे विधेयक पारीत होण्यासाठी दोन तृतीयांश म्हणजेच ३५२ मतं आवश्यक होती.

दरम्यान, मतदानाचा निकाल जाहीर करताना लोकसभा अध्यक्ष ओम बिर्ला म्हणाले की, १३१ वी घटनादुरुस्ती विधेयक पास होऊ शकलेलं नाही. कारण यासाठी आवश्यक असणारं दोन तृतीयांश बहुमत सभागृहात मिळू शकलेली नाहीत.

त्याचबरोबर या निकालामुळं सरकारवर घटनादुरुस्ती विधेयकासोबतच आणलेली इतर दोन विधेयक ही पटलावर मांडण्यापूर्वीच मागे घेण्याची नामुष्की मोदी सरकारवर ओढवली आहे. त्यामुळं विशेष अधिवेशन बोलावून मतदारसंघ फेररचना करण्याचा घाट सरकारच्या अंगलट आला आहे.