Supreme Court On NCP Dispute : सुप्रीम कोर्टाचा निवडणुकीच्या तोंडावर अजितदादांच्या राष्ट्रवादीला दणका; पुढील 36 तासांत 'ती' जाहिरात द्या!

New Delhi : राष्ट्रवादी काँग्रेस पक्ष आणि चिन्हाबाबत बुधवारी सुप्रीम कोर्टात सुनावणी झाली. या सुनावणीदरम्यान कोर्टाने अजित पवार यांच्या राष्ट्रवादी काँग्रेसला महत्वाचे आदेश दिले आहेत. पक्ष आणि चिन्हाचे प्रकरण न्यायप्रविष्ट असल्याच्या जाहिराती पुढील 36 तासांत वृत्तपत्रात प्रसिध्द कराव्यात, असे कोर्टाने म्हटले आहे.

अजित पवारांच्या वतीने ज्येष्ठ विधिज्ञ बलबीर सिंह यांनी कोर्टाच्या सुचनांचे पालन करण्याची हमी दिली आहे. सुप्रीम कोर्टाचे न्यायमूर्ती सूर्यकांत, दीपांकर दत्ता आणि उज्जल भुइयां यांच्या खंडपीठासमोर ही सुनावणी झाली. शरद पवार यांच्याकडून कोर्टात याचिका दाखल करण्यात आली आहे. यामध्ये अजित पवार गटाला घड्याळ हे चिन्ह निवडणुकीत वापरण्यापासून रोखावे, अशी मागणी याचिकेत करण्यात आली आहे.

कोर्टाने यापूर्वी लोकसभा निवडणुकीआधी अजित पवार गटाला प्रचार साहित्यामध्ये पक्ष आणि चिन्ह न्यायप्रविष्ट असल्याचे नमूद करावे, असे आदेश दिले होते. मागील महिन्यांत झालेल्या सुनावणीवेळी कोर्टाने या सुचनांचे पालन करू, असे प्रतिज्ञापत्र कोर्टात सादर करण्यास सांगितले होते.

बुधवारी झालेल्या सुनावणीदरम्यान बलबीर सिंह यांनी दावा केला की, ‘राष्ट्रवादी काँग्रेस पक्ष सुप्रीम कोर्टाने चिन्हाबाबत दिलेल्या सुचनांचे पालन करत आहे. तसेच पक्षाने याबाबतची जाहिरात प्रसिध्द करण्यासाठी वृत्तपत्रांशी संपर्कही साधला आहे.’ त्यावर कोर्टाने किती तासांत जाहिरात प्रकाशित करणार, असा प्रश्न केला. सिंह यांनी दोन-तीन दिवस असे उत्तर देताच न्यायमूर्ती सूर्यकांत यांनी 24 तास किंवा जास्तीत जास्त 36 तासांत जाहिरात प्रसिध्द करा, असे निर्देश कोर्टाने दिले आहेत.

शरद पवारांच्या वतीने विधिज्ञ प्रांजल अग्रवाल यांनी बाजू मांडली. अजित पवारांच्या पक्षाकडून सोशल मीडियात कोणत्याही जाहिरातीशिवाय अपलोड केलेले व्हिडिओ हटवून पुरावे नष्ट करत असल्याचा दावा अग्रवाल यांनी केला. ते खोटे बोलत असल्याचा आरोपही त्यांनी केला.

दरम्यान, कोर्टाने अजित पवारांना निवडणुकीदरम्यान घड्याळ या चिन्हाचा वापर करण्यापासून रोखण्यास नकार दिला आहे. त्यामुळे अजित पवारांसाठी हा मोठा दिलासा आहे. त्यामुळे त्यांच्या पक्षात हे चिन्ह वापरता येणार आहे.