Operation Sindoor debate : 'ऑपरेशन सिंदूर'वर संसदेत चर्चेआधी शशी थरूर अन् राहुल गांधींचे ‘मौन व्रत’; नेमकं काय घडलं?

Rahul Gandhi’s Strategic Silence in Parliament : संसदेमध्ये आज ऑपरेशन सिंदूरवर चर्चा होणार आहे. मात्र, बिहारमधील मतदारयाद्यांच्या पुनर्पडताळणीच्या मुद्द्यावरून विरोधकांकडून जोरदार घोषणाबाजी करण्यात आली आहे. त्यामुळे लोकसभेचे कामकाज दोनदा तहकुब करण्यात आले. ऑपरेशन सिंदूरवर विरोधी पक्षनेते राहुल गांधी यांच्यासह विरोधकांकडून अनेक नेते बोलणार आहेत. मात्र, त्याआधी मोठी घडामोड समोर आली आहे.

ऑपरेशन सिंदूरनंतर केंद्र सरकारने परदेशात विविध नेत्यांच्या नेतृत्वाखाली शिष्टमंडळे पाठवली होती. त्यातील एका शिष्टमंडळाचे नेतृत्व काँग्रेसचे खासदार शशी थरूर करत होते. तेव्हापासून काँग्रेस आणि थरूर यांच्यामध्ये मोठी दरी निर्माण झाली आहे. थरूर यांच्याकडून सातत्याने मोदी सरकारचे कौतुक केले जात असल्याने काँग्रेसमधील नेत्यांकडून टीका होत होती.

आता आज संसदेत ऑपरेशन सिंदूरवर चर्चा होणार असली तरी वक्त्यांच्या यादीमध्ये मात्र थरूर यांचे नाव नसल्याने आश्चर्य व्यक्त केले जात आहे. थरूर संसदेत दाखल झाल्यानंतर त्यांना मीडियाने याबाबत विचारले असता थरूर केवळ ‘मौन व्रत’ एवढेच बोलले आणि तिथून काढता पाय घेतला. यावरून आता चर्चांना उधाण आले आहे.

थरूर यांनी जाहीरपणे मौन व्रत असल्याचे सांगत न बोलण्याचे संकेत तर दिले पण दुसरीकडे राहुल गांधींनीही मीडियाशी बोलणे टाळले. सभागृहाच कामकाज दुपारी १२ नंतर तहकुब झाल्यानंतर राहुल गांधी व प्रियांका गांधी इतर नेत्यांसह सभागृहातून बाहेर आले. यावेळी त्यांनी मीडियाच्या प्रतिनिधींनी घेरत काही प्रश्न विचारले.

मीडियाचे प्रतिनिधी प्रश्न विचारत होते, पण राहुल गांधी यांनी एकाही प्रश्नाचे उत्तर दिले नाही. ते बराच वेळ केवळ मोबाईलमध्ये बघत राहिले. शेजारी उभ्या असलेल्या प्रियांका गांधीही बोलल्या नाहीत. मी संसदेतच बोलेन, असे राहुल यांनी स्पष्टपणे सांगितले. एरव्ही संसदेच्या आवारात मीडियाशी बोलताना राहुल नेहमीच तयार असतात. मात्र, आज त्यांनीही मौन व्रत पाळल्याचे दिसले.