Language Row : पंतप्रधान मोदी, शहांची मातृभाषा गुजराती, पण आम्ही..! केंद्रीय मंत्र्यांनी सुनावलं

NEP Policy : केंद्रीय मंत्री किरेन रिजिजू यांनी भाषेच्या मुद्द्यावरून सुरू असलेल्या वादात उडी घेतली आहे. त्यांनी नवीन सैक्षणिक धोरणातील तीन भाषांचा फार्म्यूला देशासाठी चांगला असल्याचे सांगतिले. त्याचप्रमाणे पंतप्रधान नरेंद्र मोदी, गृहमंत्री अमित शाह यांच्या मातृभाषेचा मुद्दा उपस्थित करत त्यांनी विरोधकांना खडेबोलही सुनावले.

प्रामुख्याने दक्षिण भारतातील राज्यांमध्ये एनईपीला जोरदार विरोध होत आहे. या राज्यांनी तीन भाषांचा फॉर्म्यूला राबवण्यास नकार दिला आहे. त्यावरून मोठा वादही निर्माण झाला आहे. याअनुषंगाने किरेन रिजिजू म्हणाले, एनईपीबाबत प्रामुख्याने दक्षिणेकडील राज्यांमध्ये गैरसमज निर्माण झाला आहे किंवा काही लोक जाणीवपूर्वक त्याचे राजकारण करण्याचा प्रयत्न करत आहेत.

आज नरेंद्र मोदी हे भारताचे पंतप्रधान आहेत, पण हिंदी ही त्यांची मातृभाषा नाही. त्यांची मातृभाषा गुजराती आहे. आपले गृहमंत्री अमित शाह यांची मातृभाषा गुजराती आहे. शिक्षण मंत्री धर्मेंद्र प्रधान यांची उडिया आणि माझी मातृभाषा अरुणाचली आहे. पण आम्ही सर्वजण एक टीम बनून देशासाठी काम करत आहोत, असे रिजिजू म्हणाले.

आपण सर्वजण भारतीय आहोत. सर्वांनी एकत्रितपणे काम करूयात. प्रत्येक धर्म, प्रत्येक समाज आणि देशातील प्रत्येक जण समान आहे. प्रत्येकाला समान संधी दिली जाईल, असे पंतप्रधान नेहमी सांगतात. त्यामुळे जात, धर्म किंवा राज्याच्या आधारे देशाचे विभाजन करू नका, असेही रिजिजू यांनी विरोधकांना सुनावले.

दरम्यान, गुरूवारी महाराष्ट्रताही भाषेचा मुद्दा चांगलाच तापला होता. आरएसएसचे भैय्याची जोशी यांनी मराठीबाबत केलेल्या विधानावरून विरोधकांनी जोरदार विरोध केला. त्यावर मुख्यमंत्री देवेंद्र फडणवीस यांनी विधानसभेत स्पष्टीकरण देत महाराष्ट्रात आणि मुंबईत मराठीच भाषा असल्याचे सांगितले. विरोधकांनी मुंबईतील हुतात्मा स्मारकाला अभिवादन करत जोशी यांच्या विधानाचा निषेध केला. त्यानंतर जोशी यांनी सारवासारव करण्याचा प्रयत्न केला.