Parliament Winter Session : सोनिया गांधींकडील 51 खोक्यांमध्ये कोणते गुपित? नेहरूंच्या ‘खास’ पत्रांवरून लोकसभेत हंगामा

New Delhi : देशाचे पहिले पंतप्रधान पंडित जवाहरलाल नेहरू यांची काही महत्वाची पत्रे 51 खोक्यांमध्ये सोनिया गांधी यांच्याकडे असल्याचा दावा केला जात आहे. दिल्लीतील पंतप्रधान संग्रहालयातील अधिकाऱ्यांनी हा दावा केला असून ती परत देण्याची मागणीही करण्यात आली आहे. संग्रहालयाच्या वतीने आधी सोनिया गांधी आणि आता राहुल गांधींना याबबात पत्र लिहिण्यात आले आहे.

पंतप्रधान संग्रहालय सोसायटीचे सदस्य रिजवान कादरी यांनी याबाबत माहिती दिली आहे. त्यावरून सोमवारी लोकसभेत हंगामा झाला. भाजपने हा मुद्दा उचलून धरत त्या पत्रांमध्ये काय आहे, हे देशाला समजायला हवे. त्यासाठी ही पत्र परत द्यायला हवीत, अशी मागणी भाजपने केली आहे.

दरम्यान, कादरी यांनी दिलेल्या माहितीनुसार, सोनिया गांधींना यूपीए सरकारच्या काळात 2008 मध्ये संग्रहालयातील काही पत्र 51 खोक्यांमध्ये देण्यात आली होती. जवाहरलाल नेहरू मेमोरियलने ही पत्रे 1971 मध्ये नेहरू मेमोरियल म्यूझियमला (आता पंतप्रधान संग्रहालय) दिली होती. हा ऐतिहासिक दस्तावेज आहे.

नेहरूंच्या खासगी पत्रांमध्ये त्यांनी एडविना माउंटबॅटन, अल्बर्ट आईनस्टाईन, जयप्रकाश नारायण, पद्मजा नायडू, विजया लक्ष्मी पंडित, अरुणा आसण अली, बाबू जगजीवन राम आणि गोविंद वल्लभ पंत यांच्यासारख्या व्यक्तिमत्वांना लिहिलेल्या पत्रांचाही समावेश आहे. ही पत्रे परत द्यावीत, अशी विनंती राहुल गांधी यांना करण्यात आल्याचे कादरी यांनी सांगितले.

सोनिया गांधीनांही याबाबत सप्टेंबर महिन्यात पत्र पाठवून विनंती करण्यात आली होती. पण त्यांच्याकडून प्रतिसाद न मिळाल्याने राहुल गांधींकडे विनंती करण्यात आल्याचेही कादरी यांनी सांगितले. कादरी यांच्या या दाव्यानंतर भाजपने सोमवारी हा मुद्दा लोकसभेत उपस्थित केला.

भाजपचे खासदार संबित पात्रा म्हणाले, माजी पंतप्रधानांनी पत्रात काय लिहिले होते, याची माहिती देशाला जाणून घ्यायची आहे. घाईघाईत ही पत्र का नेण्यात आली. देशापासून काय लपवले जात आहे? ही पत्रे आता कुठे ठेवण्यात आली आहेत, असा सवालही पात्रा यांनी उपस्थित केला.