Rahul Gandhi : मतदानाआधीच काँग्रेसने हरियाणा जिंकला? राहुल गांधींनी सांगितली विजयाची सहा कारणे

Rahul Gandhi News : हरियाणा विधासभा निवडणुकीसाठी आज (शनिवारी) मतदान पार पडत आहे. या निवडणुकीचा निकाल 8 ऑक्टोबरला जाहीर होणार आहे. मात्र, मतदानाच्याआधीच राहुल गांधी यांनी आपल्या व्हाॅट्सअप चॅनेलवर पोस्ट टाकत 8 ऑक्टोबरला हमीभावासह हरियाणात काँग्रेसचे सरकार येत असल्याचा दावा केला आहे.

विजयाचा दावा करताना काँग्रेस हरियाणामध्ये का जिंकत आहे याची सहा कारणे देखील राहुल गांधी यांनी सांगितली आहेत. राहुल गांधी म्हणाले की, काँग्रेसची एकजुट आणि स्पष्ट रणनिती हे काँग्रेस जिंकणार असल्याचे मुख्य कारण आहे.

काँग्रेसची एकजूट आणि स्पष्ट रणनीती याशिवाय शेतकऱ्यांच्या विश्वास, बेरोजगारी, महिला सुरक्षा, दलित मतदारांचा विश्वास आणि परिवार ओळख पत्रामुळे त्रस्त नागरिक या सहा कारणांमुळे काँग्रेसची हरियाणामध्ये सत्ता येत असल्याचा दावा राहुल गांधी यांनी केला आहे.

राहुल गांधी म्हणाले, हरियाणा निवडणुकीत काँग्रेस जनतेच्या समस्या सोडवण्यासाठी तयारीनिशी एकजुटीने रिंगणात उतरली आहे. आमचे प्राधान्य विकासित हरियाणासाठी आहे. ज्यासाठी आम्ही एक लोकप्रिय जाहीरनामा तयार केला आहे आणि प्रत्येक विभागाच्या गरजा लक्षात घेऊन त्या पूर्ण करण्याची आम्ही हमी दिली आहे.

शेतकऱ्यांचा काँग्रेसवर विश्वास आहे. तीन शेतीविषयक कायदे आणि एमएसपीची हमी नसल्याने शेतकऱ्यांमध्ये भाजपविषयी नाराजी आहे. शेतकऱ्यांविषयी आम्ही संवेदनशील आहोत. एमएसपीच्या कायदेशीर हमीचे आम्ही आश्वासन दिले आहे, असे देखील राहुल गांधी यांनी सांगितले आहे.

दलित मतदारांचा विश्वास

लोकसभा निवडणुकीत राज्यघटनेचे संरक्षण, जातीय जनगणना आणि लोकसंख्यानिहाय वाटणी याद्वारे सर्वांना न्याय देण्याचे काम काँग्रेसने हाती घेतले आहे. त्यामुळे हरियाणातील दलितांचा मोठा वर्ग काँग्रेससोबत उभा आहे, असा दावा राहुल गांधींनी केला आहे. तसेच हरियाणाच्या परिवार ओळख पत्राने (PPP) सुमारे 10 लाख कुटुंबांना बीपीएल यादीतून काढून टाकले आहे. त्यामुळे अनेक महत्त्वाच्या योजना या गरिब कुटुंबांना मिळत नाही. ही ओळखपत्रे रद्द करण्याचे काँग्रेसने आश्वासन दिले आहे. त्यामुळे काँग्रेसला गरिब कुटुंबांचा पाठींबा आहे, असे देखील राहुल गांधी यांनी आपला सोशल मीडियातील पोस्टमध्ये म्हटले आहे.