Shivsena Whip : शिवसेनेच्या खासदारांना तीन ओळींचा 'व्हिप'; ठाकरे गटाच्या भूमिकेकडे लक्ष

Delhi News : पंतप्रधान नरेंद्र मोदी मणिपूर विषयावर संसदेत निवेदन करत नसल्याने विरोधकांनी अविश्वासाचा ठरवा सादर केला आहे. तो लोकसभा अध्यक्ष ओम बिर्ला यांनी मंजूर केला. आता उर्वरित दिवसांत लोकसभेत विविध महत्वाची विधेयकांवर चर्चा होणार आहे. या चर्चेवेळी आणि विधेयकांच्या मतदानावेळी उपस्थित राहण्यासाठी शिवसेनेच्या (शिंदे गट) लोकसभेतील खासदारांसाठी 'व्हिप' जारी केला आहे. (Latest Political News)

शिवसेनेचे गटनेते राहुल शेवाळे यांनी काढला तीन ओळींचा 'व्हिप' आपल्या खासदारांसाठी जारी केला आहे. संसदेत येणाऱ्या विविध बिलासंदर्भात मतदानावेळी उपस्थित राहून पक्षाच्या आदेशानुसार मतदान करण्याच्या सूचना'व्हिप'द्वारे देण्यात आल्या आहेत. तसेच देशात गाजत असलेले दिल्ली सरकारसंदर्भात महत्त्वाचे विधेयक प्रस्तावित आहे. त्याबाबत होणाऱ्या चर्चा आणि मतदानावेळी उपस्थित राहण्याच्या सूचनाही शेवाळेंनी दिल्या आहेत.

संसदेचे अधिवेशन २० जुलैपासून सुरू झालेले असले तरी मणिपूर हिंसाचारवरून विरोधकांनी सुरुवातीपासून सभागृहात घोषणाबाजी केली आहे. परिणामी बहुतांशवेळा संभागृहाचे कामकाज दिवसभरासाठी तहकूब करण्याची वेळ आली. या पार्श्वभूमीवर उरलेल्या दहा दिवसात महत्वाची चर्चा होऊन काही विधेयके मंजूर करण्याची शक्यता आहे. यावेळी संख्याबळ जास्त असण्यासाठी लोकसभेच्या उर्वरित दिवसात कामकाजात पूर्णवेळ सहभागी राहण्याचे आदेशही 'व्हिप'द्वारे देण्यात आले आहे.

ठाकरे गटाच्या भूमिकेकडे लक्ष

निवडणूक आयोगाची उद्धव ठाकरेंच्या शिवसेनेला मान्यता असून त्यांना मशाल हे चिन्ह दिले आहे. ही मान्यता अद्याप कायम असून या गटाने लोकसभेत वेगळा कक्ष देण्याचीही मागणी केली आहे. या गटात विनायक राऊत, अरविंद सावंत, राजन विचारे, संजय जाधव व ओमराजे निंबाळकर या खासदारांचा समावेश आहे. आता शिंदे गटाकडून जारी केलेला 'व्हिप' शिवसेनेनच्या सर्व १८ खासदारांना लागू होणार का, हा प्रश्न कायम आहे. यामुळे शिवसेना ठाकरे गटाचे खासदार नेमके कोणाला मतदान करतात आणि 'व्हिप'चे उल्लंघन करतात का नाही, याकडे देशाचे लक्ष लागले आहे.

(Edited by Sunil Dhumal)