Rajeev Kumar Helicopter Emergency landing : मोठी बातमी! केंद्रीय निवडणूक आयुक्तांच्या हेलिकॉप्टरचं शेतात आपत्कालीन 'लँडिंग'

Rajeev Kumar Helicopter Emergency landing in Uttarakhand : उत्तराखंडच्या पिथौरगढ जिल्ह्यात केंद्रीय निवडणूक आयुक्त राजीव कुमार आणि राज्याचे उपमुख्य निवडणूक अधिकारी डॉ. विजय कुमार जोगदंडे यांच्या हेलिकॉप्टरचं इमरजन्सी लँडिंग करावं लागल्याची घटना समोर आली आहे. ही घटना त्यावेळी घडली जेव्हा दोन्ही वरिष्ठ अधिकारी बुधवारी तीन दिवसीय दौऱ्यावर हेलिकॉप्टरद्वारे मिलम क्षेत्रात जात होते.

दरम्यान वातावरण अचानक खराब झाल्याने, चालकासमोर हेलिकॉप्टरची इमर्जन्सी लँडिंग करण्याशिवाय पर्याय नव्हता. केंद्रीय निवडणूक आयुक्त राजीव कुमार(Rajeev Kumar) आणि राज्याचे उप मुख्य निवडणूक अधिकारी डॉ. विजय कुमार जोगदंडे यांचा पिथौरगड मुस्यारीतील मिलम भागात तीन दिवसीय दौरा नियोजित होता.

वातावरण खराब असल्या कारणाने चालकाने सुरक्षेच्या कारणास्तव हेलिकॉप्टरची रालम भागातील एका शेतात आपत्कालीन लँडिंग करण्याचा निर्णय घेतला. सुदैवाने या आपत्कालीन लँडिंगच्यावेळी कोणतीही दुर्घटना घडली नाही. चालक आणि अधिकाऱ्यांसह निवडणूक आयुक्त सुखरूप आहेत. परिसरातील स्थानिकांनी तत्काळ मदतीसाठी घटनास्थळी धाव घेतली होती.

अधिकाऱ्यांनी सांगितले की, हवामानात सुधारणा होताच केंद्रीय निवडणूक आयुक्त आणि त्यांच्या टीमला त्यांच्या गंतव्यस्थानी सुरक्षितपणे नेण्यासाठी पर्यायी व्यवस्था करण्यात येत आहे. ही आपत्कालीन परिस्थिती असतानाही केंद्रीय निवडणूक आयुक्तांचा दौरा सुरूच राहणार असून, ते लवकरच आपल्या नियोजित कार्यक्रमांचा भाग म्हणून दुर्गम भागांना भेट देणार आहेत.

(Edited by - Mayur Ratnaparkhe)