Diya Kumari : राजकुमारीच्या हातात सत्तेच्या चाव्या; श्रीरामाच्या वंशज असल्याचा दावा

Rajasthan CM : राजस्थानच्या मुख्यमंत्रिपदी भजनलाल शर्मा यांची वर्णी लागली आहे. त्यांच्या जोडीला दोन उपमुख्यमंत्री देण्यात आले आहेत. त्यामधील एक नाव जयूपरच्या राजघराण्यातील आहे. राजकुमारी दिया कुमारी यांना भाजपने उपमुख्यमंत्रिपदाचा मान दिला आहे. दिया कुमारी यांनी आपण रामाचे वंशज असल्याचा दावा यापूर्वी केला होता.

दिया कुमारी (Diya Kumari) या विद्याधर नगर विधानसभा (Assembly) मतदारसंघातून विजयी झालेल्या आहेत. त्यांना तब्बल 1 लाख 58 हजार मते मिळाली आहे. दिया कुमारी या दिवंगत ब्रिगेडिअर भवानी सिंह आणि महाराणी पद्मिनी देवी यांच्या कन्या आहेत. त्यांनी दहा वर्षांपूर्वी राजकारणात पाऊल ठेवले होते. पहिल्यांदा 2013 मध्ये माधोपूर विधानसभा मतदारसंघातून त्या विधानसभेत गेल्या होत्या. (Rajasthan Deputy CM and BJP Leader Diya Kumari)

दिया कुमारी या 2019 मध्ये राजसमंद लोकसभा मतदारसंघातून निवडून गेल्या होत्या. पक्षाने त्यांना यावेळी पुन्हा विधानसभेच्या निवडणुकीत उतरवले. त्या पुन्हा विद्याधर नगर मतदारसंघातून भरघोस मतांनी निवडून आल्या. आता त्यांच्या गळ्यात उपमुख्यमंत्रिपदाची माळ टाकण्यात आली आहे.

(राजकारणातील महत्त्वाच्या बातम्यांचे अपडेट्ससाठी सरकारनामाचे अधिकृत WhatsApp चॅनल फॉलो करा!)

दिया कुमारी यांनी 2019 मध्ये आपण भगवान श्रीराम यांचा मुलगा कुश यांचे वंशज असल्याचा दावा केला होता. आम्ही रामाचे वंशज आहोत. आमच्या हस्तलिखितांमध्ये, वंशावळीत आणि कागदपत्रांमध्ये सर्व संदर्भ असल्याचा दावा त्यांनी केला होता. त्यांनी ताजमहालही आपला महाल असल्याचा दावा केला होता. हा राजवाडा होता. त्याबाबतची कागदपत्रेही आपल्याकडे असल्याचा दावा त्यांनी केला होता.

दिया कुमारी यांचे शालेय शिक्षण जयपूरमधील महाराणी गायत्री देवी गर्ल्स पब्लिक स्कूल आणि नवी दिल्लीतील मॉडर्न स्कूलमध्ये झाले. उच्च शिक्षण लंडनमधील चेल्सी स्कूल ऑफ आर्ट्समध्ये झाले.

 (Edited By - Rajanand More)