Autobiography Ban: निवृत्त अधिकाऱ्यांनी आता आत्मचरित्र लिहायचं विसरा! सरकार लवकरच आणणार नवा अध्यादेश

Autobiography Ban: लोकसभेत माजी लष्करप्रमुख जनरल मनोज नरवणे यांच्या आत्मचरित्रावरुन झालेल्या राड्यानंतर केंद्र सरकारनं आता मोठा निर्णय घेतला आहे. त्यानुसार, आता सरकारी वरिष्ठ अधिकाऱ्यांनी निवृत्तीनंतर २० वर्षे स्वतः आत्मचरित्र लिहिता येणार नाही, यासाठीचा अध्यादेश लवकरच येणार असल्याची माहिती मिळते आहे.

सरकारी सुत्रांच्या हवाल्यानं माध्यमांतील वृत्तानुसार, केंद्रीय मंत्रिमंडळाच्या बैठकीत हा प्रस्ताव मांडण्यात आला. यामध्ये मंत्र्यांकडून उच्चपदांवर असलेल्या निवृत्त अधिकाऱ्यांकडून संवेदनशील माहिती प्रकाशित करण्याबाबत चिंता व्यक्त करण्यात आली. हा विषय सध्यातरी सरकारच्या अधिकृत अजेंड्यावर नसला तरी, लवकरच यासंदर्भात औपचारिक आदेश येण्याची शक्यता आहे. २ फेब्रुवारी रोजी विरोधी पक्षनेते राहुल गांधी यांनी लोकसभेत माजी लष्करप्रमुख जनरल मनोज नरवणे यांच्या अप्रकाशित आत्मचरित्राचा संदर्भानं भारत-चीन सीमावादावरचा मुद्दा उपस्थित करण्याचा प्रयत्न केला.

पण त्यांना सरकारच्या मंत्र्यांकडून बोलू दिलं गेलं नाही. लोकसभा अध्यक्षांनी देखील त्यांना हा औचित्यभंगाचा मुद्दा असल्याचं सांगत परवानगी नाकारली. पण यामुळं झालेल्या गोंधळात वारंवार सभागृहाचं काम स्थगित करावं लागलं होतं. पण राहुल गांधींच्या याक्षेपानंतर कथित पुस्तकाच्या हस्तलिखिताची पीडीएफ आवृत्ती मोठ्या प्रमाणात व्हायरल झाली होती. यामुळं या पुस्तकाचे प्रकाशक पेंग्विन रँडम हाऊस इंडियानं अनधिकृत व्हायरल पुस्तकाबद्दल कायदेशीर कारवाईचा इशारा दिला होता, यासंदर्भात लीक झालेल्या कागदपत्राबाबत दिल्ली पोलिसांनी एफआयआर देखील दाखल केला होता.

दरम्यान, जनरल नरवणे यांनी नंतर त्यांच्या प्रकाशकाच्या भूमिकेचे समर्थन केलं आणि हे देखील स्पष्ट केलं की, हे पुस्तक अद्याप अधिकृतरित्या सर्वसामान्य जनतेसाठी प्रसिद्ध करण्यात आलेलं नाही. पण या पुस्तकाच्या हस्तलिखितातील मजकूर, विशेषतः भारत-चीन सीमेवरील कैलास पर्वतरांगात चीनकडून भारताच्या हद्दीत घुसण्याचा झालेला प्रयत्न अजूनही वादाच्या केंद्रस्थानी आहे. डिसेंबर २०२३मध्ये हे पुस्तक प्रकाशित होणार होतं. त्याच्या प्री-ऑर्डरसाठी एक लिंकही शेअर करण्यात आली होती. पण पुस्तकातील वादग्रस्त मुद्द्याची कुणकुण लागताच संरक्षण मंत्रालयानं नरवणे यांना पुस्तक प्रकाशित न करण्याची विनंती केल्यानं लेखक नरवणे यांनी हे पुस्तक मागे घेतलं होतं.